ताप्लेजुङमा एसईई परीक्षाका लागि सुरक्षाकर्मी सहित ४ सय १० जना जनशक्ति परिचालित हुने

खगेन्द्र अधिकारी
ताप्लेजुङ,चैत ५ । चैत ७ गते देखि हुने माध्यमिक शिक्षा परीक्षामा ताप्लेजुङका १७ वटा केन्द्रमा सुरक्षाकर्मी सहित ४ सय १० जनशक्ति परिचालित हुने भएका छन् ।

शिक्षा विकास तथा समन्वय इकाइ ताप्लेजुङका प्रमुख युगमणि सवेहाङका अनुसार १७ केन्द्रमा १७ जना केन्द्राध्यक्ष र १८ जना सहायक केन्द्राध्यक्ष खटिने छन् । ७५ भन्दा कम परीक्षार्थी भएको केन्द्रमा सहायक केन्द्राध्यक्ष हुने छैनन् भने १ सय ५० जना सम्म परीक्षार्थी भएको केन्द्रमा एकजना तथा सो भन्दा बढी भए सोहि अनुपातमा सहायक केन्द्राध्यक्ष नियुक्त गर्न सकिने प्रावधान रहेको छ । यस्तै १ सय १३ जना निरीक्षक(गार्ड)परिचालन हुने शिक्षा विकास तथा समन्वय इकाइ ताप्लेजुङले जनाएको छ ।

माध्यमिक शिक्षा परीक्षा सञ्चालन निर्देशिका २०८१ मा २० बिद्यार्थी बराबर एकजना निरीक्षक राख्न पाउने व्यवस्था रहेको छ । यस्तै १७ केन्द्रमा २१ जना परीक्षा सहायक हुनेछन् भने ४४ जना सहयोगी रहने भएका छन् । १७ वटा केन्द्रमा नेपाल प्रहरी र सुरक्षाकर्मीका गरी कुल १ सय ९७ जना सुरक्षाकर्मी परिचालन हुने भएका छन् ।

जिल्ला प्रहरी प्रमुख(डिएसपी) रवि रावलले परीक्षा केन्द्रको सम्बेदनशिलताका आधारमा महिला प्रहरी सहित नेपाल प्रहरीका ५ देखि ७ तथा सशस्त्र प्रहरी जनशक्ति समेत परिचालन हुने जानकारी दिनुभयो । उहाँका अनुसार फुङलिङ नगरपालिका क्षेत्रका केन्द्रमा आवश्यक पर्ने प्रश्नपत्र सहितका परीक्षा सामग्री जिल्ला प्रहरी कार्यालयमा भण्डारण गरिएको छ । सो भन्दा बाहिरका केन्द्रका लागि पुगेका परीक्षा सामग्री नजिकको प्रहरी कार्यालयमा सुरक्षित गरी परीक्षाका दिन सम्वन्धित केन्द्राध्यक्ष सहितको रोहवरमा परीक्षा केन्द्रमा पु¥याउने गरी सुरक्षाको व्यवस्था मिलाईएको समेत रावलले जानकारी दिनुभयो ।

ताप्लेजुङमा यसबर्ष साधारणतर्फ १ हजार ४ सय १५ जना नियमित तथा ७ सय १० जना ग्रेडबृद्धि र प्राविधिकधारतर्फ १ सय २२ नियमित र २५ ग्रेडबृद्धि गरी कुल २ हजार २ सय ७२ परीक्षार्थीले एसईई परीक्षा लेख्दैछन् ।