एसईई परीक्षा : ७५ भन्दा कम परीक्षार्थी भएको केन्द्रमा सहायक केन्द्राध्यक्ष नहुने,२० बिद्यार्थी बराबर एक निरीक्षक

खगेन्द्र अधिकारी
ताप्लेजुङ,चैत २ । चैत ७ गते देखि हुने माध्यमिक शिक्षा परीक्षा(एसईई)मा ७५ जना भन्दा कम परीक्षार्थी भएको परीक्षा केन्द्रमा सहायक केन्द्राध्यक्ष नहुने भएका छन् ।

१ सय ५० जना सम्म परीक्षार्थी भएको केन्द्रमा एकजना सहायक केन्द्राध्यक्ष हुनेछन् भने २० जना बिद्यार्थी बराबर एकजना निरीक्षक(गार्ड)राखिने भएको छ । माध्यमिक शिक्षा परीक्षा सञ्चालन तथा व्यवस्थापन निर्देशिका २०८१ अनुसार २० जना बिद्यार्थी बराबर एकजना निरीक्षकको व्यवस्था रहेको शिक्षा विकास तथा समन्वय इकाई ताप्लेजुङका प्रमुख युगमणि सवेहाङले जानकारी दिनुभयो । प्रत्येक परीक्षा केन्द्रमा एकजना केन्द्राध्यक्ष रहने छन् । सहायक केन्द्राध्यक्ष राख्न पाउने केन्द्रमा सम्वन्धित केन्द्राध्यक्षले सहायक केन्द्राध्यक्ष चयन गर्न पाउने व्यवस्था रहेको छ ।

ताप्लेजुङमा १७ वटा परीक्षा केन्द्र हुने यसअघि नै तय गरिएको छ । सम्भव भएसम्म परीक्षा केन्द्र रहेको बिद्यालयका प्रधानाध्यापकलाई नै केन्द्राध्यक्ष तोक्ने व्यवस्था रहेको छ । १७ केन्द्रमध्ये सबैभन्दा कम परीक्षार्थी सिद्धकाली मावि दोखु परीक्षा केन्द्रमा रहेका छन् । त्यहाँ ७४ जना परीक्षार्थी रहेको शिक्षा विकास तथा समन्वय इकाईले जनाएको छ । समन्वय इकाइका अनुसार १७ केन्द्रमध्ये सबैभन्दा बढी परीक्षार्थी बालसुवोधिनी संस्कृत माध्यमिक बिद्यालय मेदिवुङमा रहनेछन् । त्यहाँ ३ सय १८ परीक्षार्थीले परीक्षा लेख्दैछन् । यस्तै भानुजन मावि परीक्षा केन्द्रमा २ सय ४४ जना,सिँवा मावि लिङखिम परीक्षा केन्द्रमा ८६ जना,युवाबर्ष मावि कैंजले परीक्षा केन्द्रमा १ सय ४७ जना,जनता मावि हाङदेवामा ७७ जना,मोति मावि खोक्लिङमा १ सय १७ जना,त्रिभुवन मावि थुकिमामा १ सय ७ जना र सिनाम मावि सिनाममा १ सय ४८ जना परीक्षार्थी रहने छन् ।

थेचम्बु मावि थेचम्बुमा १ सय १४ जना,तेल्लोक मावि तेल्लोकमा ९९ जना,गणेश मावि खेवाङमा ८० जना,भञ्ज्याङ मावि लिम्बूदिनमा १ सय ६९ जना,मैवाखोला मावि तेम्बेमा १ सय ३७ जना,सरस्वती मावि हाङपाङमा १ सय २१ जना,दुर्गा मावि फुलवारीमा १ सय १४ जना र सरस्वती मावि तापेथोकमा १ सय २० जना परीक्षार्थी हुनेछन् । ताप्लेजुङबाट यसबर्षको एसईई परीक्षामा साधारणतर्फ नियमितका १ हजार ४ सय २५ तथा ग्रेडबृद्धिका ७ सय १० तथा प्राविधिकधारतर्फ १ सय २२ नियमित र २५ ग्रेडबृद्धिका गरी कुल २ हजार २ सय ७२ जना परीक्षार्थीले परीक्षा लेख्ने शिक्षा विकास तथा समन्वय इकाइ ताप्लेजुङले जनाएको छ ।