भोजपुरले जित्यो पुसेमेला भलिबल उपाधि

-उज्यालो पोष्ट
ताप्लेजुङ, पुस ६ । ताप्लेजुङको दोभानमा सम्पन्न पुसेमेला अन्तर्राष्ट्रिय आमन्त्रण तथा अन्तर जिल्लास्तरीय पुरुष भलिबल प्रतियोगिताको उपाधि भोजपुरले जितेको छ । झापाको पाथीभरा टाइगर भलिबल क्लबलाई ३–० को सोझो सेटमा पराजित गर्दै भोजपुरले उपाधि जितेको हो ।
शुक्रबाार भएको फाइनलमा झापामाथि भोजपुरले २५–२१, २५–१६ र २५–२३ को अंकमा जित निकालेको थियो । उपाधि जितसँगै भोजपुरले तीन लाख रुपियाँ नगद पुरस्कारसहित ट्रफी, पदक र प्रमाणपत्र पाएको छ । त्यस्तै उपविजेता बनेको झापाले एक लाख ७५ हजार रुपियाँ नगद र ट्रफी, पदक तथाा प्रमाणपत्र प्राप्त ग¥यो ।
सेमिफाइनमा सङ्खुवासभाको सभापोखरीलाई २५–२३, ३०–२८ र २५–२१ को सेटमा पराजित गर्दै भोजपुर फाइनल पुगेको थियो । त्यस्तै मुकेश मेमोरियल क्बल ताप्लेजुङलाई २५–१९, २५–२१ र २५–१९ ले पराजित गर्दै झापा फाइनलमा पुगेको थियो । यता विजेतालाई मेरिङ्देन गाउँपालिका उपाध्यक्ष दुर्गा श्रेङचोङबाङ लगायतले पुरस्कार वितरण गर्नुभएको आयोजक पुसेमेला सञ्चालन समितिका अध्यक्ष हेम चोङ्बाङले जानकारी दिनुभयो ।
प्रतियोगितामा भारत, सिक्किमको नाम्चे भलिबल क्लबसहित सात टोलीको सहभागिता रहेको थियो । ऐतिहासिक पुसेमेलाको अवसरमा प्रतियोगिता पुस १ गते सुरु भई ५ गते शुक्रबार सम्पन्न भएको हो ।