दोभान आँखा शिविरमा ६ सय जनाको परीक्षण,७२ जनाको शल्यकृया,३ सय ६० ले पाए निःशुल्क चश्मा

खगेन्द्र अधिकारी
ताप्लेजुङ,मंसिर २१ । ताप्लेजुङको दोभानमा जारी शल्यकृया सहितको निःशुल्क आँखा शिविरको दुईदिनको अवधिमा ६ सय जनाले आँखाको परीक्षण तथा उपचार गराएका छन् ।

७१ जनाको आँखाको शल्यकृया भएको छ । नेपाल नेत्रज्योति संघ ताप्लेजुङ,मेरिङदेन गाउँपालिका र सेवा फाउण्डेसनको संयुक्त आयोजनामा भएको शिविरमा शल्यकृया गरिएका मध्ये ५२ जना मोतियाबिन्दुको र १९ जना साधारण शल्यकृया गरिएको नेपाल नेत्रज्योति संघद्धारा सञ्चालित डिचेन डोङगला स्मारक आँखा उपचार केन्द्रका फिल्ड आईवर्कर काजीमान थेबेले जानकारी दिनुभयो । उहाँका अनुसार शिविरका क्रममा ३ सय ६० जनालाई निःशुुल्क चश्मा बितरण गरिएको छ ।

पहिलो दिन २ सय ९४ र दोस्रो दिन शुक्रवार ३ सय ६ जनाको आँखाको परीक्षण तथा उपचार गरिएको थियो । नाम दर्ता शुल्क समेत नलाग्ने शिविरमा औषधि र चश्मा निःशुल्क गरिएको थियो भने दोभानबासीकोतर्फबाट शल्यकृया गरेका बिरामीलाई निःशुल्क खाने व्यवस्था गरिएको थियो ।