सभामुख घिमिरेद्वारा अक्षयकोषदातालाई सम्मान

-उज्यालो पोष्ट
ताप्लेजुङ, मङ्सिर २० । सभामुख देवराज घिमिरेले ताप्लेजुङको ग्रामीण भेगमा रहेको सिनाम बहुमुखी क्याम्पस तथा माध्यमिक विद्यालयमा विभिन्न अक्षयकोष स्थापना गर्ने अक्षयकोषदातालाई सम्मान गर्नुभएको छ । उक्त क्याम्पस तथा माविको वार्षिक उत्सवको अवसरमा सभामुख घिमिरेले अक्षयकोषदातालाई सम्मान गर्नुभएको हो ।
बिहीबार सिनाम बहुमुखी क्याम्पसको १७ औं वार्षिक उत्सव तथा सिनाम माध्यमिक विद्यालयको ७५ औं वार्षिक उत्सव विभिन्न कार्यक्रम गरी मनाइएको छ । क्याम्पस तथा विद्यालयको वार्षिक उत्सव कार्यक्रममा सहभागी बन्नुभएका सभामुख घिमिरेले अक्षयकोषदाताहरुलाई सम्मान गर्नुभएको क्याम्पस प्रमुख महेन्द्रप्रकाश गौतमले बताउनुभयो ।
क्याम्पस प्रमुख तथा प्रधानाध्यापक गौतमका अनुसार विद्यालयमा विभिन्न अक्षयकोष रकम स्थापना गर्ने ६० जनाभन्दा बढी अक्षयकोषदातालाई घिमिरेले सम्मान गर्नुभएको छ । वार्षिक उत्सवको अवसरमा अक्षयकोषदातालाई सम्मानसँगै अन्य विभिन्न कार्यक्रम पनि गरिएको छ । उत्कृष्ट भूमिक निर्वाह गर्ने क्याम्पस तथा विद्यालय व्यवस्थापन समितिका पदाधिकरी, अभिभावक तथा उत्कृष्ट विद्यार्थीलाईसमेत सम्मान साथै पुरस्कृत गरिएको छ ।
यता आफ्नो जन्मस्थलमा रहेको क्याम्पस तथा विद्यालयको वार्षिक उत्सव कार्यक्रममा सभामुख घिमिरे सहभागी हुन आउनुभएको बताइएको छ । घिमिरेको जन्मस्थल ताप्लेजुङको सिरिजंघघा गाउँपालिका–३ सिकैँचा हो । सिनाम बहुमुखी क्याम्पस तथा माध्यमिक विद्यालय भने सिरिजंघा गाउँपालिका–१ मा पर्दछ । कार्यक्रममा प्रतिनिधिसभा सदस्य एवम् पूर्वमन्त्री योगेशकुमार भट्टराई, प्रतिनिधिसभा सदस्य उर्मिला थेबे, प्रदेशसभा सदस्य तिलकुमार मेन्याङ्बो लगायतका जनप्रतिनिधि तथा राजनीतिक दलका नेतृत्व सहभागी हुनुभएको थियो ।