सानिमा बैंकबाट ताप्लेजुङका दुई बिद्यार्थीले पाए बार्षिक ५० हजारको छात्रवृत्ति,सर्त पूरा भए १२ कक्षामा पनि पाउने

खगेन्द्र अधिकारी
ताप्लेजुङ, भदौ २३ । सानिमा बैंकको ताप्लेजुङ फुङलिङस्थित शाखाले फुङलिङ नगरपालिका क्षेत्रभित्रका जेहेन्दार र विपन्न एक छात्र र एक छात्रा गरी दुईजनालाई जनही बार्षिक ५० हजार रुपैयाँ बराबरको छात्रवृत्ति प्रदान गरेको छ ।

आबेदन दिएका मध्ये आबेदनको प्रकृयाभित्र परेका र स्वयं उपस्थित भएका ५ जनाको निबेदनउपर छात्रवृत्ति सिफारिस समितिले पेश भएका कागजात,शैक्षिक नतिजा,घरायसी तथा पारिवारिक अवस्था,विपन्नताको प्रारम्भिक सूचनाको विश्लेषण र अन्तवार्ता समेतका आधारमा छात्रवृत्ति पाउने दुईजनाको नाम छनौट गरेको हो । सानिमा बैंकको फुङलिङस्थित शाखाका प्रवन्धक सुनिल भट्टराईका अनुसार छनौट हुनेमा फुङलिङ नगरपालिका वडा नं २ स्थित वीरेन्द्र मावि देवलिङ्गेमा अध्ययनरत मिली मादेन (३.०६ जिपीए) र फुङलिङ नगरपालिका वडा नं ९ घर भई भानुजन मावि अम्बिटारमा अध्ययनरत रोजित गुरुङ (३.१८ जिपीए) रहनु भएको छ । मादेन आमाबुवा दुबै गुमाएर आफ्नी फुपुको सहारामा रहँदै अहिले कक्षा ११ मा अध्ययरत रहनु भएको छ । गुरुङ भानुजनमा सिभिल इञ्जिनियर अध्ययरत हुनुहुन्छ ।

सानिमा बैंकले काठमाण्डौ उपत्यका बाहिरका प्रत्येक शाखाहरुबाट शाखा रहेको स्थानको स्थायी बासिन्दा,जेहेन्दार,गरिव तथा विपन्न वर्ग,शाखा रहेको सामुदायिक बिद्यालयमा निरन्तर ३ बर्ष देखि अध्ययन गरी पहिलो प्रयासमै एसईई उर्तीण भएको र शाखा रहेको स्थानकै शैक्षिक संस्थामा अध्ययन गर्ने वा गरिरहेका बिद्यार्थीलाइ लामो समयदेखि यस्तो छात्रवृत्ति प्रदान गर्दै आएको जनाएको छ । सोहि अनुसार फुङलिङ शाखाबाट पनि यस्तो छात्रवृत्ति प्रदान भएको भट्टराईले जानकारी दिनुभयो । छात्रवृत्ति शैक्षिक संस्थामा भर्ना भएको मितिदेखि लागु हुने छ । आवेदकले १ प्रति पासपोर्ट साइजको फोटो,एसईई उत्र्तीण भएको मार्कसिट र चारित्रिक प्रमाणपत्र,बाबु र आमाको नागरिकता र बिगत ३ बर्षदेखि शाखा रहेको स्थान भित्र रहेका सरकारी÷सामुदायिक बिद्यालयमा निरन्तर अध्ययन गरेको प्रमाणित कागजात पेश गर्नुपर्ने थियो ।

बैंकका अनुसार छात्रवृत्ति प्राप्त गर्ने बिद्यार्थीले कक्षा ११ र १२ मा कम्तिमा‘सी’ग्रेडमा उर्तीण हुनु अनिवार्य छ । सो भन्दा तल्लो ग्रेड ल्याएको वा पढाइलाइ निरन्तरता दिन नसकेको वा शाखा रहेको स्थानका शैक्षिक संस्थामा नपढेको अवस्थामा छात्रवृत्ति सम्वन्धी करार रद्ध हुने बैंकले जनाएको छ । छात्रवृत्ति प्राप्तकर्तालाइ बैंकले घरायसी खर्च(पकेट मनि)वापत मासिक २ हजारका दरले २४ हजार र शिक्षण संस्थामा लाग्ने पढाइ शुल्क,पाठ्यसामग्री र स्टेशनसरी वापत थप २६ हजार गरी बार्षिक ५० हजार रुपैयाँ उपलब्ध गराउने भएको छ । आवेदनका सर्तहरु पूरा भएको अवस्थामा अहिले छात्रवृत्ति प्राप्त गर्ने बिद्यार्थीले कक्षा १२ को अध्ययनका लागि समेत बैंकबाट थप ५० हजाररुपैयाँ प्राप्त गर्ने बैंकले जनाएको छ ।