ताप्लेजुङमा दुर्लभ रेडपाण्डादेखि सालक सम्मको उद्धार

-उज्यालो पोष्ट
ताप्लेजुङ, साउन ८ । ताप्लेजुङमा दुर्लभ रेडपान्डा (हाब्रे) देखि सालकसम्म विभिन्न वन्यजन्तुको उद्धार गरिएको छ । डिभिजन वन कार्यालय ताप्लेजुङका अनुसार विभिन्न समयमा विभिन्न प्रजातिका १४ वटा वन्यजन्तुको उद्धार गरिएको हो ।
डिभिजन वन कार्यालयका वन अधिकृत प्रमेश्वर पासवानका अनुसार मंगलबार मात्र एक दुर्लभ सालकको उद्धार गरिएको छ । फुङ्लिङ नगरपालिका–७ ऐश्वर्य चोकमा सोमबार राति फेला परेको सालकको उद्धार गरी मंगलबार राति फुङ्लिङ नगरपालिकाकै एक सुरक्षित वनमा छोडिएको वन अधिकृत पासवानले बताउनुभयो ।
वन अधिकृत पासवान, पाथीभरा सव डिभिजन वन कार्यालयका फरेस्टर फुपुग्याबु शेर्पा, जिल्ला प्रहरी कायालयका वरिष्ट प्रहरी हवल्दार सन्तोष तामाङ, सञ्चारकर्मी लगायतको उपस्थितिमा सालकलाई प्राकृतिक बासस्थान अर्थात सुरक्षित वनमा छोडिएको हो । उक्त सालकलाई प्रहरीले फेला पारी मंगलबार बिहान डिभिजन वन कार्यालायलाई बुझाएको थियो।
यता मंगलबार उद्धार गरिएकोसमेत हालसम्म चारवटा सालकको सकुशल उद्धार भएको वन अधिकृत पासवानले जानकारी दिनुभयो । उहाँकाअनुसार हालसम्म तीनवटा दुर्लभ रेडपान्डा (हाब्रे) को उद्धार गरिएको छ । फुङ्लिङ नगरपालिका–१० फुरुम्बु, वडा ११ फावाखोला र फक्ताङ्लुङ गाउँपालिका–४ इखाबु क्षेत्रबाट रेडपान्डाहरु उद्धार गरिएको हो । फुरुम्बु र फावाखोला भेगअन्तर्गत पर्ने पाथीभरा क्षेत्रको वन रेडपान्डा पाइने विशेष क्षेत्रको रुपमा रहेको छ ।
यस्तै हालसम्म पाँचवटा रतुवा मृगको उद्धार गरिएको डिभिजन वन कार्यालयले जनाएको छ । त्यस्तै हालसम्म दुईवटा चरी बाघ र एउटा हिमाली कालो भालुको उद्धार गरिएको डिभिजन वन कार्यालयका प्रमुख रामजी साहले जानकारी दिनुभयो । उक्त वन्यजन्तुहरु विगत २०६४ सालयता उद्धार गरिएका हुन् । उद्धार गरिएका वन्यजन्तुहरु सुरक्षित वन तथा प्राकृतिक बासस्थानमा छोड्ने गरिएको वन कार्यालय प्रमुख साहले बताउनुभयो ।