ताप्लेजुङको सिरिजङ्गा भयो आगामी आवका लागि नीति कार्यक्रम प्रस्तुत गर्ने जिल्लाकै पहिलो पालिका

खगेन्द्र अधिकारी
ताप्लेजुङ,जेठ १० । ताप्लेजुङको सिरिजङ्गा गाउँपालिकाले वडा नं ६ मामाङखेमा रहेको नेपालको पहिलो र एकमात्र लिम्बू संग्रहालय एकीकृत गर्दै मुन्धुम पर्यटन पार्क बनाउने घोषणा गरेको छ ।

आगामी आव २०८१।८२ का लागि बिहीबार नीति तथा कार्यक्रम प्रस्तुत गर्दै पालिका अध्यक्ष लालकृष्ण चौहानले उक्त घोषणा गर्नु भएको हो । यहाँका ९ स्थानीय तहमध्ये आगामी आवका लागि नीति तथा कार्यक्रम प्रस्तुत गर्ने सिरिजङ्गा पहिलो स्थानीय तह हो । मुन्धुम पर्यटन पार्क निर्माणका लागि पालिकाले बिस्तृत परियोजना प्रतिबेदनको पारी तत्काल निर्माण कार्य अघि बढाउने पालिकाले घोषणा गरेको छ । पालिकाले याम्फुदिनको आम्जीखोलाबाट नयाँ झोरेनी,तुप्लुङ,दुन्दुडाँडा,नर्गचा चाइराम हुँदै कञ्चनजंघा आधार शिविरसम्म जाने साहसिक पदमार्ग निर्माणलाई पालिकाले गौरवको योजनाको रुपमा निरन्तरता दिएको छ । पाथीभरा क्षेत्रलाई प्रवद्र्धन गर्न पालिकाले पर्यटकिय गतिविधि र पूर्वाधार विकासका कार्यक्रम सञ्चालन गर्ने भएको छ ।

पालिकाले मालपोत र नापी कार्यालयबाट प्रदान हुने सेवा स्थानीय तहमार्फत प्रवाह हुने प्रवन्धका लागि आवश्यक पहल गर्ने भएको छ । स्थानीय उत्पादनको बजारीकरण गरी अर्थतन्त्र चलायमान बनाउन पालिकाको केन्द्र तेल्लोकमा साप्ताहिक हाट बजार सञ्चालनको अवधारणा समेत पालिकाले अघि सारेको छ । उपभोक्तामैत्री बजार स्थापनाका लागि पालिकाले नियमित बजार बजार अनुगमन गर्ने संयन्त्रको प्रभावकारी कार्य सञ्चालनमा जोड दिएको छ । स्थानीय लिम्बू समुदायको भाषा र लिपि संरक्षणका लागि प्रत्येक वडाका सामुदायिक बिद्यालयमार्फत लिम्बू समुदायको भाषा र लिपि संरक्षण गर्ने कार्यक्रम सञ्चालन गरिने भएको छ ।

पालिकाले आगामी आवको पहिलो त्रैमासिक भित्र बिद्यालयको अनुगमन तथा मूल्याङ्कन गरी न्यून बिद्यार्थी संख्याको आधारमा बिद्यालयको मर्जर तथा तह घटुवा गर्ने नीति समेत पालिकाले लिएको छ । सामुदायिक बिद्यालयहरुमा बिद्यार्थी संख्या न्यून भर्नादर कम गर्न तथा बालबालिकाहरुको शैक्षिक भबिष्यका लागि बीउ पुँजीको रुपमा कम्तिमा १५ बर्ष सम्म कोष कायम रहनेगरी बजेटको प्रवन्ध गर्ने पालिकाले नीति लिएको छ । आधारभूत शिक्षा उर्तीण परीक्षाको नतिजाको मूलयाङकनका आधारमा बार्षिक रुपमा उत्कृष्ट एक बिद्यार्थी र लगनशिल तथा प्रभावकारी सिकाईमा केन्द्रित एक शिक्षकलाई पुरस्कृत गर्ने गाउँपालिकाले घोषणा गरेको छ ।

पालिकाका प्रत्येक वडामा खेलकुद क्लव गठन गरी उक्त युवा सञ्जाललाई खेलकुद,विपद् व्यवस्थापन,स्वयंसेवी र सामाजिक क्षेत्रका काममा परिचालन गर्ने नीति गाउँपालिकाले तयार गरेको छ । पालिकाका ७२ वटै टोल विकास संस्थामा बाल क्लव गठन गरी बाल प्रतिभा पहिचान गर्ने,नेतृत्व क्षमताको विकास गर्ने,कूलत र कुसंस्कार बिरुद्धका अभियान सञ्चालनमा प्रेरित गर्ने कार्यक्रम सञ्चालन गरिने भएको छ । गाउँपालिकाले‘बिरामीहरुको सहारा,सिरिजङ्गा’कार्यक्रम अघि सारेको छ । यस कार्यक्रममार्फत जेष्ठ नागरिक र फरक शारीरिक क्षमता भएका मानिसहरुलाई लक्षित गरी प्रत्येक तीन–तीन महिनाको फरकमा स्वास्थ्य शिविर सञ्चालन गर्ने भएको छ । मुटु रोगी,उच्च रक्तचाप,मधुमेह र दमका बिरामीहरुलाई निःशुल्क औषधिको व्यवस्था मिलाउने पालिकाले घोषणा गरेको छ । भौगोलिक विकटतालाई मध्यनजर गर्दै पालिकाले एकीकृत स्वास्थ्य शिविर सञ्चालन गर्ने भएको छ ।

पालिकाले जंक फुड(पत्रु खाना घटाउने)कार्यक्रमलाई अघि बढाउने भएको छ । चट्याङबाट हुने क्षति षति न्यूनीकरणका लागि पालिकाले उच्च जोखिम क्षेत्र पहिचान गरी चट्याङ निशेध क्षेत्र उपकरण जडान गर्ने पालिकाले घोषणा गरेको छ । वित्तीय सुशासन कायम गर्न पालिकाले थप बेरुजु बढ्न नदिने तथा बेरुजु रकम फस्र्यौट गर्ने कार्यलाई प्राथमिकतामा साथ अघि बढाइने भएको छ ।‘सेवा लिने घरघरबाट,सरकारी काम प्रविधिबाट’भन्ने नारा स्थापित गर्दै पालिकाले सम्भव भएसम्म घरमै बसिबसी राजश्व भुक्तानी गर्न सकिने प्रविधिको विकास गर्ने घोषणा गरेको छ । विकास निर्माणका कार्यहरुको अनुगमन तथा मूल्याङकनमा एकरुपता ल्याउन पालिकाका प्राविधिक कर्मचारीलाई हप्ताको ४ दिन कार्यालयको काममा केन्द्रित गर्ने तथा अन्तिम दुईदिनलाई अनुगमनका खर्चिने गरीको कार्यतालिका बनाई लागु गर्ने पालिकाले घोषणा गरेको छ ।

सेवाग्राहीमैत्री सेवा प्रवाहका लागि पालिकाले‘बैंकको जस्तो सेवा तथा होटलको जस्तो आतिथ्यता’अभियान सञ्चालन गर्ने भएको छ । त्यसका लागि पालिकाले सेवाप्रवाहमा कर्मचारीलाई प्रतिबद्ध र जवाफदेहि बनाई कामको आधारमा प्रोत्साहन रकमको समेत व्यवस्था गर्ने घोषणा समेत गरेको छ । कार्यक्रममा पालिका उपाध्यक्ष डाक्टर चित्रकुमार मावो लिम्बूले नीति तथा कार्यक्रम अनुसार बजेटको तयारीमा लाग्ने प्रतिबद्धता व्यक्त गर्नु भएको छ ।

कार्यक्रममा पालिकाको वडा नं १ का वडाध्यक्ष सिंहबहादुर इवारम,वडा नं ५ का वडाध्यक्ष बमप्रसाद गौतम,वडा नं ४ का वडाध्यक्ष रुपदास भट्टराई र कार्यपालिका सदस्य गंगा खड्का भट्टराईले नीति तथा कार्यक्रमको सान्र्दभिकता र पालिकाको आगामी भूमिका बारे बताउनु भएको थियो । पालिकाका प्रमुख प्रशासकीय अधिकृत मधुर नेपालीका अनुसार यो संगै १५ औं गाउँसभा तथा बजेट अधिबेशन समेत सुरु भएको छ ।