मेची राजमार्ग, तमोर कोरिडोर र ताप्लेजुङमा यातायात ठप्प

उज्यालो पोष्ट
ताप्लेजुङ, जेठ २ । ताप्लेजुङमा निर्माण गर्न लागिएको पाथीभरा केबलकार परियोजनाविरुद्ध संघर्षरत रहेको समूहले आह्वान गरेको बन्दका कारण मेची राजमार्ग, तमोर कोरिडोर र ताप्लेजुङमा यातायात ठप्प भएको छ । सो समूहले आह्वान गरेको दुई दिने बन्दका कारण बुधबार बिहानैदेखि यातायात सेवा ठप्प भएको हो ।
ताप्लेजुङस्थित प्रसिद्ध तीर्थस्थल पाथीभरा क्षेत्रमा पाथीभरा (मुक्कुमलुङ) दर्शन केबलकार प्रालिले परियोजना सञ्चालन गर्न लागेको हो । यता आफ्नो माग विपरीत केबलकार परियोजनाको क्रियाकलाप सुरु गरिएकोभन्दै संघर्षरत समूहले मङ्गलबार नै विज्ञप्ति जारी गर्दै बुधबार र बिहीबार दुई दिन मेची राजमार्ग, तमोर कोरिडोर र ताप्लेजुङ जिल्लामा यातायात बन्द आह्वान गरेको हो ।
बन्दका कारण मेची राजमार्ग र तमोर कोरिडोर हुँदै सञ्चालन हुने लामो दूरीका सवारी साधन ठप्प भएका छन् । यस्तै ताप्लेजुङभित्र सञ्चालन हुने स्थानीय यातायात सेवा पनि ठप्प भएको छ । यातायात सेवा ठप्प हुँदा मेची राजमार्ग हुँदै ताप्लेजुङदेखि पाँचथर, इलाम, झापा जाने यात्रु रोकिएका छन् । त्यस्तै तमोर कोरिडोर हुँदै ताप्लेजुङदेखि पाँचथर, धनकुटा चौविसे, भेडेटार हुँदै धरान, इटहरीका लागि यात्रा गर्ने यात्रु पनि रोकिएका छन् । यातायात ठप्प हुँदा यात्रु प्रभावित बनेका छन् ।
स्थानीय जनताको माग र भावना विपरीत केबलकार निर्माण गर्ने कार्यअन्तर्गत परियोजनास्थलमा रुख कटान गर्न सुरु गरिएपछि संघर्षरत समूह थप आन्दोलित बनेको हो । केबलकार परियोजनाविरुद्ध संघर्षरत रहेको मुक्कुमलुङ संयुक्त संघर्ष समिति, पाथीभरा केबलकार खारेजी संयुक्त संघर्ष समितिलगायत विभिन्न छ वटा समूहले संयुक्त विज्ञप्ति प्रकाशित गरी यातायात बन्दको आह्वान गरेका हुन् ।
पवित्र आस्थाको केन्द्र तथा ऐतिहासिक पवित्र धार्मिकस्थलमा बहुमूल्य जडीबुटी, राष्ट्रिय फूल लालीगुराससहितका उपोन्मुख वनस्पतिहरु डकैत शैलीमा कटान गर्न थालिएकाले आफूहरु आन्दोलनमा उत्रनुपरेको संघर्षरत पक्षले उल्लेख गरेका छन् । ऐतिहासिक स्थलको वन उजाड बनाउनेगरी रुख कटान गर्ने व्यक्तिहरुले सार्वजनिक रुपमा माफी माग्नुपर्ने र केबलकार योजना रद्ध गर्नुपर्ने पनि विज्ञप्तिमा उल्लेख छ ।