कार्यकर्ताको खटाई कम र चुनावी खर्च बृद्धिले समाज परिवर्तनको यात्रा कमजोर भयो ः एमाले महासचिव पोखरेल

खगेन्द्र अधिकारी
ताप्लेजुङ,बैशाख २४ । नेकपा एमालेका महासचिव शंकर पोखरेलले नेता कार्यकर्ताको कम खटाई र चुनावी खर्च बृद्धिले राजनीतिक र सामाजिक परिवर्तनको यात्रा क्रमशःकमजोर हुँदै गएको बताउनु भएको छ । जनताले दिएको अभिमत पूरा गर्न नसक्दा नेता र जनता टाढा हुने भएकोले नेताले जनताको अभिमतको उचित सम्बोधन गर्न सक्नुपर्ने समेत उहाँले बताउनुभयो ।

एमाले ताप्लेजुङको १२ औं जिल्ला अधिबशेनको उद्घाटन गर्दै पोखरेलले भन्नुभयो‘संगठन निर्माण र निर्वाचनका बेला जति खट्नुपर्ने हो,त्यो नभएर पनि समाज परिवर्तनको यात्रा कमजोर भएको हो’ ।‘हामी मेरो र तेरोमा बिभाजित भयौं,मेरो मान्छे भए जाँगर चल्ने र अर्काको मान्छे भए जाँगर मर्ने’पार्टीको आम प्रवृत्तिको कुरा उठाउँदै उहाँले यस्तो प्रवृत्ति त्यागेर पार्टी संगठन बलियो बनाएर उभिन कार्यकर्ताहरुलाई आग्रह समेत गर्नु भएको छ । राजनीतिक परिवर्तनलाई पूर्ण ठान्ने र त्यसपछिका अभिभारालाई कम आँक्ने पद्धतिले समाजवादको यात्रा थप कमजोर हुने उहाँको भनाई थियो । बिचार,संगठन र पार्टीको शक्तिबाट समाजलाई बदल्न कार्यकर्ताको सर्मपण प्रथम पक्ष हुने भएकोले यो सच्चाईलाई आत्मसाथ गर्न समेत उहाँले आग्रह गर्नु भएको छ ।

अहिले देशको अभिभारा भनेको समाजलाई शान्तिपूर्ण राजनीतिक परिवर्तनबाट बदल्नु रहेको भन्दै पोखरेलले राज्यको नेतृत्व कुन वर्गले गर्ने बिषय हल नभए सम्म त्यो पूरा नहुने बताउनुभयो । बिभिन्न समयमा भएका क्रान्तिबाट पनि समाजवादको यात्रा पूरा नभएकोले अधुरो क्रान्तिको सपना पूरा गर्न एमालेले मिसन ८४ को कुरा अघि सारेको पोखरेलको भनाई थियो । उहाँले राज्यसत्ताको नेतृत्वमा पार्टी र पार्टीका माध्यमबाट समाज परिवर्तनको यात्रा पूरा गर्न देशभर एमालेको नेतृत्वमा सरकार निर्माणको आवश्यकता औंल्याउनुभयो । भन्नुभयो‘त्यो अधुरो क्रान्तिको लक्ष्य पूरा गर्ने अभिभारा तमाम एमाले कार्यकर्ताको काँधमा आएको छ,त्यही भएर कार्यकर्तामा पार्टी र संगठन बलियो बनाएर सरकार निर्माण हुन सक्ने त्याग र सर्मपणको आवश्यकता छ’ ।

सभालाई एमाले सचिव तथा प्रतिनिधिसभाका सांसद योगेशकुमार भट्टराई,स्थायी कमिटी सदस्यद्धय शेरधन राई र सुजिता शाक्य,पोलिटब्युरो सदस्य तिलकुमार मेन्याङ्वो,कोशी प्रदेश कमिटी अध्यक्ष घनश्याम खतिवडा,केन्द्रीय सदस्यहरु टंक आङबुहाङ,पासाङ शेर्पा,उर्मिला थेबे,अइन्द्रसुन्दर नेम्बाङ,एमाले पाँचथर जिल्ला कमिटी अध्यक्ष बिष्णु सापकोटा,युवा संघका केन्द्रीय अध्यक्ष क्षितिज थेबे सहित ताप्लेजुङमा क्रियाशिल बिभिन्न राजनीतिक दलका प्रमुखहरुले सम्बोधन गर्नु भएको थियो । सोमवारबाट सुरु एमालेको जिल्ला अधिबेशन नयाँ नेतृत्व समेत चयन गरी मंगलवार सक्नेगरी तय भएको एमाले ताप्लेजुङले जनाएको छ । अधिबेशनको बन्दसत्र सञ्चालनका लागि प्रदेश कमिटी अध्यक्ष खतिवडा संयोजक रहेको अध्यक्ष मण्डलको प्रस्ताव गरिएको छ । जिल्लाभरबाट ३ सय ७९ जना प्रतिनिधि सहभागी हुनु भएको छ ।