मैवाखोलाद्वारा साम्तुङका बासिन्दालाई सोलार वितरण

-उज्यालो पोष्ट
ताप्लेजुङ, चैत २२ । ताप्लेजुङको मैवाखोला गाउँपालिकाले दुर्गमका बिपन्न परिवारलाई सोलार बत्ती वितरण गरेको छ । मैवाखोला गाउँपालिकाकै दुर्गम क्षेत्र वडा–६ फाकुम्बा साम्तुङका बिपन्न परिवारलाई सोलार वितरण गरिएको हो ।
गाउँपालिकाले साम्तुङ बस्तीका बस्तीका सबै परिवारलाई सोलार बत्ती वितरण गरेको छ । दुई चरण गरेर साम्तुङ बस्तीका बिपन्न ३३ परिवारलाई सोलार बत्ती वितरण गरेको गाउँपालिकाले जनाएको छ । गाउँपालिकाका अध्यक्ष विजयप्रकाश वनेमका अनुसार गतवर्ष ११ परिवार र यसवर्ष बुधबार २२ परिवारलाई सोलार वितरण गरिएको छ ।
गाउँपालिकाको नवीकरणीय ऊर्जा प्रवर्द्धन कार्यक्रममार्फत बिपन्न परिवारलाई सोलार वितरण गरिएको अध्यक्ष वनेमले जानकारी दिनुभयो । हालसम्म टुकी बत्तीको भरमा बस्दै आएका साम्तुङका सर्वसाधारणको घरमा उज्यालो बत्तीको व्यवस्था गरिदिने गाउँपालिकाको योजनाअनुसार प्रत्येक परिवारलाई सोलार उपलब्ध गराएको उहाँले बताउनुभयो ।
मैवाखोला गाउँपालिकाका ६ वटै वडामा राष्ट्रिय प्रसारण लाइनको विधुत् विस्तारको काम पनि हुँदै आएको छ । विधुत् विस्तार भइसकेको वडा तथा क्षेत्रमा बिजुली बल्न थाले पनि वडा ६ फाकुम्बाको साम्तुङ बस्ती भौगोलिक बनावटका कारण दुर्गम भएकाले राष्ट्रिय प्रसारण लाइन विस्तार हुनलाई अझै समय लाग्ने पालिका अध्यक्ष वनेमले बताउनुभयो ।
यता निःशुल्क रुपमा सोलार बत्ती पाएपछि साम्तुङका सर्वसाधारण अँध्यारोबाट मुक्ति पाएको बताएका छन् । सोलार बत्तीले घरमा उज्यालो बत्ती बाल्न र मोबाइल चार्ज गर्ने सहितको सुविधा मिलेको सर्वसाधारणको भनाइ छ । गाउँपालिका अध्यक्ष वनेम, निमित्त प्रमुख प्रशासकीय अधिकृत लक्ष्मीमाया गोम्देन, प्रवक्ता चन्द्रकुमार तामाङ लगायतको उपस्थितिमा सर्वसाधारणलाई सोलार वितरण गर्नुभएको हो ।