माओवादी जनयुद्धका शहीद परिवारलाई सम्मान

-उज्यालो पोष्ट
ताप्लेजुङ, फागुन २१ । ताप्लेजुङमा शहीद सप्ताहको अवसरमा शहीद परिवारलाई सम्मान गरिएको छ । जिल्लाको फक्ताङ्लुङ गाउँपालिका र मिक्वाखोला गाउँपालिकामा माओवादी जनयुद्धका शहीद तथा बेपत्ता परिवारलाई सम्मान गरिएको हो ।
शहीद तथा बेपत्ता परिवारजनलाई नेकपा (माओवादी केन्द्र) फक्ताङ्लुङ गाउँपालिका र मिक्वाखोला गाउँपालिका कमिटीले सम्मान गरेका छन् । कपडा वितरण गर्नुका साथै सम्मानपत्रद्वारा शहीद परिवारलाई सम्मान गरिएको बताइएको छ ।
फक्ताङ्लुङ गाउँपालिका अध्यक्षसमेत रहनुभएका माओवादीका पालिका कमिटी अध्यक्ष राजन लिम्बू (मुक्ति) काअनुसार सोमबार खेजेनिमका शहीद तथा बेपत्ता परिवारलाई कपडा (लुगा) वितरण गरी सम्मान गरिएको छ । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी र माओवादी केन्द्रको स्थानीय कमिटीले संयुक्त कार्यक्रम गरी शहीद परिवारलाई सम्मान गरिएको अध्यक्ष लिम्बूले जनकारी दिनुभयो ।
उहाँकाअनुसार शहीद तथा बेपत्ता परिवारलाई सम्मानसँगै शहीदको समाधिस्थलमा सरसफाई तथा झण्डोत्तोलनका कार्यक्रमहरु गरिएको छ । फक्ताङ्लुङ गाउँपालिकामा शहीद तथा बेपत्ता परिवारको सङ्ख्या २८ रहेको पनि माओवादी केन्द्र गाउँपालिका कमिटीले जनाएको छ ।
त्यस्तै मिक्वाखोला गाउँपालिकाका ५ वटै वडाका शहीद परिवारलाई सम्मान गरिएको माओवादी केन्द्र पालिका कमिटी अध्यक्ष डण्डु लामाले जानकारी दिनुभयो । गाउँपालिका उपाध्यक्षसमेत रहनुभएका पार्टी अध्यक्ष लामाले शहीद तथा बेपत्ता परिवारका १८ जनालाई सम्मान गरिएको बताउनुभयो ।
माओवादी जनयुद्धका क्रममा शहीद तथा बेपत्ताजनले पु¥याएको अतुलनीय योगदानका कारण गणतन्त्र स्थापना भएको अथौत देशमा परिवर्तन सम्भव भएको स्मरण गर्दै शहीद परिवारलाई सम्मान गरिँदै आएको माओवादीले जनाएको छ । माओवादीले फागुन १४ देखि २१ गतेसम्म शहीद सप्ताहको रुपमा मनाउँदै आएको छ ।