फुङ्लिङ ५ का गर्भवती र सुत्केरी महिलालाई पोषण सामग्री
-उज्यालो पोष्ट
ताप्लेजुङ, पुस २० । ताप्लेजुङको फुङ्लिङ नगरपालिकामा गर्भवती तथा सुत्केरी महिलालाई पोषण सामग्री वितरण गरिएको छ । शुक्रबार फुङ्लिङ नगरपालिका–५ का गर्भवती तथा सुत्केरी महिला अर्थात हजार दिने आमालाई पोषण सामग्री वितरण गरिएको हो ।
वडाध्यक्ष सोजित श्रेष्ठका अनुसार वडाभित्रका ४८ जना लक्षित वर्गका महिलालाई पोषण सामग्री वितरण गरिएको हो । पोषण सामग्रीअन्तर्गत पर्ने घ्यु, अण्डा, चनामटर, आयोडिन नुनलगायतका सामग्री वितरण गरिएको वडाध्यक्ष श्रेष्ठले जानकारी दिनुभयो । यस्तै नुहाउने साबुन, नेलकटजस्ता सामग्रीसमेत वितरण गरिएको उहाँले बताउनुभयो ।
नगर उपप्रमुख भीमादेवी ओझाको उपस्थितिमा वितरण गर्भवती तथा सुत्केरी महिलालाई पोषण सामग्री वितरण गरेको वडा कार्यालयले जनाएको छ । वडाले चालू आर्थिक वर्षको महिला तथा बालबालिका लक्षित कार्यक्रमअन्तर्गत पोषण सामग्री वितरण गरिएको बताएको छ । गर्भवती र सुत्केरी महिलालाई वितरण भएको पोषण सामग्रीले उहाँहरुको स्वास्थ्य तन्तुरुस्त बनाउनमा सहयोग पुग्ने विश्वास लिएको वडाध्यक्ष श्रेष्ठको भनाइ छ ।
