ताप्लेजुङको मैवाखोलाका पहिरो पीडितलाई अस्थायी आवास स्थल हस्तान्तरण,६५ अस्थायी आवास कक्ष बने

खगेन्द्र अधिकारी
ताप्लेजुङ,असोज ८ । ताप्लेजुङको मैवाखोला गाउँपालिकाका पहिरो पीडितका लागि निर्माण गरिएको अस्थायी एकिकृत आवास कक्ष सोमवार पीडित परिवारलाई हस्तान्तरण गरिएको छ ।

साउन ७ गतेबाट निर्माण कार्य सुरु गरी २ महिनाको अवधिमा असोज ७ गते सम्पन्न गरी सोमवार हस्तान्तरण गरिएको हो । पालिका अध्यक्ष बिजयप्रकाश वनेम,उपाध्यक्ष कमलकुमारी लिम्बू र सहायक प्रमुख जिल्ला अधिकारी टंकबहादुर भट्टराईले संयुक्त अस्थायी एकिकृत आवास कक्ष सम्वन्धित पीडित परिवारलाई हस्तान्तरण गर्नु भएको छ । पालिका अध्यक्ष वनेमका अनुसार मैवाखोला गाउँपालिका वडा नं ४ ओदकका ६२ परिवार र ताम्राङका २ परिवार र वडा नं ३ का एक परिवार गरी अस्थायी एकिकृत आवास स्थलमा ६५ परिवार रहेका छन् । ६५ मध्ये ६३ परिवार शेर्पा समुदायका र २ परिवार लिम्बू समुदायका रहेको पालिकाले जनाएको छ ।

गाउँपालिकाका निमित्त प्रमुख प्रशासकीय अधिकृत लक्ष्मीमाया गोम्देनका अनुसार अस्थायी एकिकृत आवास स्थल निर्माणका लागि दातृ निकाय तथा बिभिन्न संस्था र व्यक्तिहरुमार्फत ५५ लाख ९२ हजार ७ सय ७० रुपैयाँ सहयोग प्राप्त भएको छ । टोल विकास संस्था,बिद्यालय र समुदायका सदस्यहरुमार्फत श्रमदान सहित ६८ लाख १ हजार र गाउँपालिकाको २६ लाख ६० हजार १७ रुपैयाँ गरी कूल १ करोड ५० लाख ५३ हजार ७ सय ८७ रुपैयाँको लागतमा एकिकृत अस्थायी आवास स्थल निर्माण गरिएको हो । औसतमा एउटा अस्थायी आवास कक्ष निर्माणका लागि २ लाख ३१ हजार ५ सय ९६ रुपैयाँ ७२ पैसाको दरले खर्च भएको समेत पालिकाले जनाएको छ । आवास स्थलमा ५ जना सम्म सदस्य भएका परिवारका लागि ३६ वटा,८ जना सम्म सदस्य भएका परिवारका लागि २३ वटा र १२ जना सम्म सदस्य भएका परिवारका लागि ६ वटा अस्थायी घर बनेका छन् । आवास स्थलमा ३६ वटा शौचालय र १८ वटा धारा निर्माण भएको गाउँपालिकाले जनाएको छ ।

ताप्लेजुङका बिपद् पीडित परिवारलाई एकिकृत बस्तिमार्फत सुरक्षित स्थानान्तरण गर्ने मैवाखोला पहिलो स्थानीय तह भएको छ । गाउँपालिकाले सहयोगी निकाय तथा दाताहरुप्रति आभार समेत प्रकट गरेको छ । गएको असार २ गते देखि आएको अबिरल बर्षापछि गएको पहिरो तथा बाढीका कारण ताप्लेजुङका अधिकाँस पालिकामा क्षति गरेको थियो । सिदिङ्वा गाउँपालिकामा ३ जनाको मृत्यु भएको थियो भने ३ जना बेपत्ता भएका थिए । बाढी तथा पहिरोले मैवाखोला,सिदिङ्वा,सिरिजङ्गा र मेरिङदेन सहितका स्थानीय तह नराम्ररी प्रभावित भएका थिए ।

घरै बस्न नसक्ने गरी बिस्थापित भएका परिवारका लागि मैवाखोलाले एकिकृत अस्थायी आवास स्थल निर्माण गरी पीडित परिवारलाई स्थानान्तरण गरेको छ । पालिका अध्यक्ष वनेमले तत्काल अस्थायी आवास स्थलमार्फत सुरक्षित स्थानान्तरण गरिएको र पछि दीर्घकालिन स्थानान्तरण गर्ने योजना बनाईएको जानकारी दिनुभयो । आवास स्थलमा बिद्युत र खानेपानीको समेत प्रवन्ध गरिएको छ ।