आव २०७९।८० मा ताप्लेजुङबाट अघिल्लो आव भन्दा झण्डै ५ लाख बढी क्युविक फिट काठ निकासी

खगेन्द्र अधिकारी
ताप्लेजुङ,साउन ५ । ताप्लेजुङबाट आर्थिक बर्ष २०७९।८० मा अघिल्लो आवभन्दा झण्डै ५ लाख क्युबिक फिट बढी काठ निकासी भएको पाइएको छ ।

डिभिजन वन कार्यालयका नायव सुब्बा युवराज पौडेलका अनुसार काठ निकासीको परिमाणमा बृद्धि भएसंगै काठ निकासी वापतको मूल्य अभिबृद्धि कर र प्रदेश सेवा शुल्क समेतमा बृद्धि भएको छ । डिभिजन वन कार्यालयका अनुसार आव २०७९÷८० मा १४ लाख ५६ हजार १९५.१५ क्युबिक फिट काठ निकासी भएको छ । अघिल्लो आव २०७८।७९ भरीमा ९ लाख ७९ हजार ४ सय ४५ क्युविक फिट मात्र काठ निकासी भएको थियो ।

डिभिजन वन कार्यालयले काठ निकासी वापतको मूल्य अभिबृद्धि कर मात्र ५ करोड ६१ लाख ८२ हजार ४ सय २८ रुपैयाँ हाराहारी संकलन गरेको छ । आव २०७८।७९ मा यो शीर्षकमा ३ करोड ३१ लाख ६१ हजार २ सय ६१ रुपैयाँ असुल भएको थियो । यस्तै प्रदेश सेवा शुल्क वापत २९ लाख ५२ हजार ६ सय २२ रुपैयाँ संकलन गरेको छ । आव २०७८।७९ मा सो शीर्षकमा १३ लाख ३६ हजार ३ सय ३९ रुपैयाँ असुल भएको डिभिजन वन कार्यालयले जनाएको छ ।

पौडेलका अनुसार आव २०७९।८० को साउन महिनामा ४२ हजार ९७१.५८ क्युविक फिट,भदौमा ४९ हजार ९८८.७८ क्युविक फिट,असोज महिनामा ६५ हजार ६२०.६३ क्युविक फिट,कात्तिक ५६ हजार ४१.३३ क्युविक फिट काठ निकासी भएको थियो । यस्तै मंसिरमा १ लाख ६५ हजार ६१४.७० क्युविक फिट,पुसमा १ लाख ४३ हजार ५८३.१० क्युविक फिट र माघ महिनामा १ लाख ४३ हजार ९.८९ क्युविक फिट काठ निकासी भएको थियो ।

यस्तै फागुनमा १ लाख ६५ हजार ८४९.३३ क्युविक फिट,चैतमा १ लाख ८८ हजार ९२९.क्युविक फिट,बैशाखमा १ लाख ४९ हजार ६६४.९ क्युविक फिट,जेठमा २ लाख १९ हजार ५२३.८७ क्युविक फिट र असारमा ६५ हजार ३९७.६३ क्युविक फिट काठ निकासी भएको थियो । डिभिजन वन कार्यालयले आवश्यक प्रकृया पूरा गरी छोडपुर्जी तथा कटान आदेश दिने गर्छ ।

यहाँबाट सबैभन्दा बढी निजी तथा आवादी जमिनमा रहेको उतिस प्रजातिको काठ निकासी हुने गरेको छ । यस्तै चिलाउने,मौवा,सिमल,चाँप,कटुस,मलातो,सिरिस,बाङ्गी काठ,पानीसाज,लप्सी सहितका प्रजातिको काठ निकासी हुने गरेको छ । उतिसको तुलनामा अन्य प्रजातिको काठको निकासी कमैमात्र हुने गरेको समेत डिभिजन वन कार्यालयले बताएको छ ।