मैवाखोलाद्वारा टहरा निर्माणका लागि ‘ड्रइङ डिजाइन’ तयार

-उज्यालो पोष्ट
ताप्लेजुङ, साउन ३ । मैवाखोला गाउँपालिकाले पहिरो प्रभावित परिवारलाई राख्नका लागि निर्माण गर्न लागिएको अस्थायी टहराको ड्रइङ डिजाइन तयार पारेको छ । पहिरोको जोखिममा रहेको ओदक बस्तीका बासिन्दालाई सुरक्षित स्थानमा स्थानान्तरणका लागि निर्माण गर्न लागिएको अस्थायी टहरा (आवास घर) ड्रइङ डिजाइन तयार पारिएको हो ।
गत असार पहिलो साता भीषण वर्षासँगै गएको बाढीपहिरोका कारण मैवाखोला गाउँपालिका–४ साँघुको ओदक बस्ती जोखिममा रहेको छ । केही दिनअघि मैवाखोला गाउँपालिका स्थानीय विपद् व्यवस्थापन समितिको समन्वयमा आयोजित सर्वपक्षीय बैठकले उक्त जोखिममा परेको बस्तीलाई सुरक्षित स्थानमा व्यवस्थापन गर्ने भनी निर्णय गरेको थियो ।
सर्वपक्षीय बैठकमार्फत निर्णय भएसँगै ओदकका ६४ परिवारलाई सुरक्षित स्थानमा अस्थायी टहरा निर्माण गरेर स्थानान्तरण गर्नेगरी टहराको ड्रइङ डिजाइन तयार पारिएको गाउँपालिका अध्यक्ष विजयप्रकाश वनेमले जानकारी दिनुभयो । अध्यक्ष वनेमकाअनुसार पहिरोको जोखिममा रहेका ओदकका बासिन्दालाई तत्कालका लागि वडा ३ साँघुस्थित मदन भण्डारी रङ्गशालाको जग्गामा अस्थायी टहरा निर्माण गरेर स्थानान्तरण गरिने भएको हो ।
उक्त रङ्गशालाको जग्गामा सानो–ठूलो गरी ६४ वटा अस्थायी टहरा निर्माण गर्नेगरी ड्रइङ डिजाइन तयार पारिएको अध्यक्ष वनेमले बताउनुभयो । उहाँकाअनुसार पाँच जनासम्म बस्न मिल्ने ३५ वटा, आठ जनासम्म बस्न मिल्ने २३ र ११ जनासम्म बस्न मिल्ने खालको छ वटा अस्थायी टहरा निर्माण गरिने भएको छ । कोठा सङ्ख्याका आधारमा टहरा सानो ठूलो हुने भए पनि एकै प्रकृतिको टहरा संरचना निर्माण गर्नेगरी डिजाइन तयार गरिएको गाउँपालिकाले जनाएको छ ।
त्यस्तै प्रत्येक टहरामा एकै किसिमको भान्सा कोठा रहने छन् भने दुई–दुईवटा टहरामा बस्ने परिवारले प्रयोग गर्न मिल्नेगरी स्नान कक्षसहित शौचालय र धारा निर्माण गरिने भएको छ । शौचालय अपाङ्गमैत्री बन्ने छन् भने रबरको ड्रम (हिल ट्याङ्की) राखेर निर्माण गरिने पानीको धारा बालमैत्री हुने पालिका अध्यक्ष वनेमले जानकारी दिनुभयो ।
यता ड्रइङ डिजाइनअनुसार अस्थायी टहरा (संरचना) निर्माण गर्नलाई रङ्गशालाको जग्गामा नाप तथा सिमाङ्कनको कार्य मङ्गलबारदेखि नै सुरु गरिएको गाउँपालिकाले जनाएको छ । टहरा निर्माणको कार्य भने आउँदो आइतबारदेखि सुरु गरिने भएको छ । अस्थायी टहरा सर्वपक्षीय बैठकको निर्णयअनुसार स्थानीयस्तरमा रहेका सबै राजनीतिक दल, सुरक्षा निकाय, जनप्रतिनिधिसहित जनशक्ति जुटेर श्रमदानमार्फत निर्माण गरिने पनि पालिका अध्यक्ष वनेमको भनाइ छ ।