मैवाखोलामा प्रत्येक महिना जेष्ठ नागरिकको स्वास्थ्य परीक्षण

-उज्यालो पोष्ट
ताप्लेजुङ, चैत ३० । ताप्लेजुङको मैवाखोला गाउँपालिकाले प्रत्येक महिना जेष्ठ तथा अपांग नागरिकको स्वास्थ्य परीक्षण गर्दै आएको छ । गाउँपालिकाले घर–घरमा पुगेर अपांग तथा जेष्ठ नागरिकको स्वास्थ्य परीक्षण गर्दै आएको हो ।
मैवाखोला गाउँपालिकाका प्रवक्ता चन्द्रकुमार तामाङका अनुसार चालू आर्थिक वर्षको कात्तिकदेखि प्रत्येक महिना जेष्ठ तथा अपांग नागरिकको स्वास्थ्य परीक्षण गरिँदै आएको छ । वडा १ का वडाध्यक्षसमेत रहनुभएका तामाङले ‘क’ र ‘ख’ वर्गका अपांग तथा ६८ वर्ष उमेर पूरा भएका जेष्ठ नागरिकको निरन्तर स्वास्थ्य परीक्षण गर्दै आएको बताउनुभयो ।
महिनाको एकपटक घर–घरमा पुगेर जेष्ठ तथा अपांग नागरिकको स्वास्थ्य परीक्षण गर्ने गाउँपालिकाको योजना कार्यान्वयन भइरहेको उहाँले बताउनुभयो । योजना निरन्तर कार्यान्वयनको क्रममा चैत महिनाका लागि लक्षित वर्ग अर्थात जेष्ठ तथा अपांग नागरिकको स्वास्थ्य परीक्षणको कार्य सम्पन्न भएको उहाँले जानकारी दिनुभयो ।
प्रवक्ता तामाङका अनुसार चैत महिनाका लागि गाउँपालिकाका ६ वटै वडाका छ सय १६ जना जेष्ठ तथा अपांग नागरिकको स्वास्थ्य परीक्षण गरिएको छ । पालिका अध्यक्ष विजयप्रकाश वनेमका अनुसार गाउँपालिकामा कार्यरत स्वास्थ्यकर्मीले लाभग्राहीको घर–घरमा पुगेर सेवा प्रवाह गरिरहनुभएको छ । जेष्ठ तथा अपांगको स्वास्थ्य परीक्षणसँगै निःशुल्क औषधि वितरण र उनीहरुलाई आवश्यक स्वास्थ्य परामर्श दिँदै आएको बताइएको छ ।