ताप्लेजुङमा दोस्रो औद्योगिक मेला सुरु,स्थानीय उत्पादनको प्रवद्र्धन र बजारीकरणमा सहयोग पुग्ने बिश्वास

खगेन्द्र अधिकारी
ताप्लेजुङ,चैत २१ । ताप्लेजुङमा मंगलवारबाट दोस्रो ताप्लेजुङ औद्योगिक कृषि तथा पर्यटन मेला तथा प्रदेशस्तरीय अर्गानिक महोत्सव सुरु भएको छ ।

स्थानीय कोदो र फापरको पिठोको प्रयोगबाट बनाईएको केक काटेर प्रदेश सरकारका पूर्व उद्योग,श्रम तथा रोजगारमन्त्री प्रतापप्रकाश हाङ्गामले महोत्सवको उद्घाटन गर्नु भएको छ । उद्घाटन कार्यक्रमलाई सम्बोधन गर्दै पूर्व प्रदेश मन्त्री हाङ्गामले स्थानीय उत्पादनलाई घरेलु उद्यमको रुपमा विकास गर्ने हो भने आत्मनिर्भरताका लागि नयाँ आयाम सृजना हुने बताउनुभयाहाँ । उनले स्थानीय कच्चा पदार्थको प्रयोग गरी घरेलु उद्यमको अभिबृद्धि र उत्पादनको प्रवद्र्धन गर्न तीनै तहका सरकारको योजना प्राथमिकतामा पर्नुपर्ने बताउनुभयो । उहाँ मन्त्री भएका बेला तत्कालिन १ नं प्रदेश सरकारले लोकल रक्सीको ब्राण्डिङ अभियान सुरु गरेको थियो ।

प्रदेशसभा सदस्य खगेनसिंह हाङ्गामले स्थानीय उत्पादनको प्रवद्र्धन,बजारीकरण र लघु उद्यम सृजनामा लगानीका क्षेत्र पहिचान गर्न महोत्सव फलदायी हुने बिश्वास लिनुभयो । घरेलु उत्पादनको प्रयोग गरेर लघु उद्यम सृजनामार्फत परनिर्भरता हटाउन बिशेष योजना र कार्यक्रम अघि बढाउनुपर्नेमा उहाँले जोड दिनुभयो । जिल्ला समन्वय समिति प्रमुख छिरिङ लामाले कच्चा पदार्थको प्रचुर सम्भावना भएको क्षेत्रमा ति कच्चा पदार्थको प्रयोग गरेर उत्पादन र बजारीकरण गर्ने हो भने उद्यम विकासका लागि त्यो भन्दा रचनात्मक कार्य अरु केहि नहुने बताउनुभयो ।

पाथीभरा याङ्वरक गाउँपालिका अध्यक्ष केशरकुमार सुब्बाले सीप,श्रम र रोजगारीलाई केन्द्रमा राखेर उद्यम सृजनामा केन्द्रित हुन लाग्नेहरुलाई स्थानीय सरकारले प्रोत्साहित गर्ने बिश्वास दिलाउनुभयो । उहाँले उत्पादन,भण्डारण,प्याकेजिङ र बजारीकरणको यात्रामा स्थानीय सरकार सम्वन्धित उद्यमीहरुसंग संगै जान सक्ने बिश्वास दिलाउनुभयो । प्रमुख जिल्ला अधिकारी गोमादेवी चेम्जोङले लघु उद्यम प्रवद्र्धनका लागि टेवा पुगोस् भन्ने मनशायले सुरु भएका यस्ता उत्सवहरुको प्रवद्र्धनमा आफुहरुले सधैं साथ र सहयोग दिने बताउनुभयो ।

कार्यक्रममा ताप्लेजुङ उद्योग बाणिज्य संघका बरिष्ठ उपाध्यक्ष दावा शेर्पा,पत्रकार महासंघ ताप्लेजुङका सचिव सुवास आचार्य,नेपाल घरेलु तथा साना उद्योग महासंघका केन्द्रीय सदस्य मातृकादेवी प्रसाँई सहितले घरेलु उद्यमको विकास र प्रवद्र्धनका आयाहरुबारे बताउनु भएको थियो । नेपाल घरेलु तथा साना उद्योग महासंघ ताप्लेजुङका अध्यक्ष राजेन्द्र भारतीका अनुसार मंगलवारबाट सुरु भएको महोत्सवमा ५० वटा स्टल रहेका छन् ।

इलाम,पाँचथर,तेह्रथुम सहितका जिल्लाबाट स्थानीय घरेलु उत्पादन लिएर उद्यमीहरु महोत्सवमा सहभागी भएको भारतीले बताउनुभयो । महोत्सवको सहआयोजक घरेलु तथा साना उद्योग कार्यालय ताप्लेजुङका प्रमुख युवराज घोर्साईका अनुसार महोत्सवमा ढाका उद्योगका उत्पादन,बाँसजन्य प्रकृतिका सामाग्री,किवी सहितका फलफुलको प्रयोगबाट बनाइएको जुस र वाइन,अलैंचीको दानबाट बनाइएको मसला र अलैंचीको रेसाबाट बनाइएको झोला सहितका घरायसी सामाग्री,दुग्धजन्य परिकार,गलैंचा,छुर्पी देखि गुन्द्रुक र सिन्की प्रजातिका खाद्य परिकार समेत रहेका छन् । यस्तै ताप्लेजुङ जिल्लामा रहेका बिभिन्न जातिय समुदायको महत्व झल्काउने खाद्य परिकारका स्टल समेत रहने छन् भने प्रदेशभरीका बिभिन्न जिल्लाका मुख्य उत्पादनहरुको बेग्लाबेग्लै स्टल रहेका छन् ।

घरेलु तथा साना उद्योग महासंघ ताप्लेजुङका सचिव हर्कराज गुरुङले ‘पृथ्वीको उपहार’को रुपमा रहेको कञ्चनजंघा सहित ताप्लेजुङ र पूर्वी नेपाल झल्कने फोटो प्रदर्शनी औद्योगिक,कृषि,पुस्तक तथा खाद्य परिकार महोत्सव समेत यो बेला सञ्चालन गरिने बताउनुभयो । दैनिक रुपमा साँझ साँस्कृतिक कार्यक्रम आयोजना गरिएको आयोजक संस्थाले जनाएको छ । यस्तै डोको र टपरी बुन्ने प्रतियोगिता,डोको क्यारी रन,साहित्यिक उत्सव सहितका कार्यक्रम हुनेछन् भने प्रदेश स्तरीय औद्योगिक बिषयमा छलफल कार्यक्रम समेत तय गरिएको छ ।

नेपाल संगित तथा नाट्य प्रज्ञा प्रतिष्ठानमा उपकुलपति समेत रहेका गायक तथा संगितकार शम्भु राई,लोक दोहोरी गायिका प्रिति आले,कुशल कार्यक्रम प्रस्तोता तथा गायक रमेश प्रसाँई,चर्चित गलजकार सुमन स्मारिका,महेश ईशारा,गणेश मुखिया सहितका साँस्कृतिकर्मीहरुको सहभागितामा हरेक दिन साहित्य तथा संगितका कार्यक्रम तय गरिएको समेत आयोजक संस्थाले जानकारी दिएको छ ।

घरेलु तथा साना उद्योग महासंघ ताप्लेजुङ र घरेलु र साना उद्योग महासंघ महिला प्रदेश समिति मुख्य आयोजक रहेको मेला तथा महोत्सवको सहआयोजकमा घरेलु कार्यालय ताप्लेजुङ सहआयोजक रहेको छ । फुङलिङ नगरपालिका सहितका ताप्लेजुङका सबै स्थानीय तह,नेपाल पर्यटन बोर्ड,प्रदेश खेलकुद विकास बोर्ड,प्रधानमन्त्री कृषि आधुनिकीकरण आयोजना र कृषि ज्ञान केन्द्र ताप्लेजुङ सहितका निकायले प्रवद्र्धनको भूमिका निर्वाह गरेको नेपाल घरेलु तथा साना उद्योग महासंघ ताप्लेजुङका सचिव गुरुङले जानकारी दिनुभयो ।

यसअघि जातिय झाँकी सहितको सहभागितामा घरेलु तथा साना उद्योग कार्यालयबाट सुरु भएको औद्योगिक ¥याली कार्यक्रमस्थल बीरेन्द्रचौक स्थित पुरानो जिल्ला प्रशासन कार्यालय रहेको भवन नजिकको प्रांगणमा पुगेर औपचारिक कार्यक्रममा परिणत भएको थियो ।