पाथीभरा बहुमुखी क्याम्पसमा नेविसंघको प्यानल विजयी

-उज्यालो पोष्ट
ताप्लेजुङ, चैत ५ । ताप्लेजुङको एकमात्र पाथीभरा बहुमुखी क्याम्पसमा स्वतन्त्र विद्यार्थी युनियनको निर्वाचनमा नेपाल विद्यार्थी संघको प्यानल निर्वाचित भएको छ । आइतबार सम्पन्न स्वतन्त्र विद्यार्थी युनियन (स्ववियु) को निर्वाचनमा अनेरास्ववियु–समाजवादी विद्यार्थी युनियनको प्यानललाई पराजित गर्दै नेविसंघको प्यानल विजयी भएको हो ।
पाथीभरा बहुमुखी क्याम्पस स्ववियु अध्यक्षमा चार विद्यार्थी संगठनको प्यानलबाट नेपाली काँग्रेस सम्वद्ध नेविसंघका अर्जुन खिम्दिङ ४०४ मत प्राप्त गरी विजयी हुनुभएको छ । खिम्दिङले अनेरास्ववियुका मिलन प्रधानलाई पराजित गर्दै अध्यक्षमा निर्वाचित हुनुभएको हो । नेकपा एमालेसम्वद्ध अनेरास्ववियुका प्रधानले ४३ मत मात्र पाउनुभएको थियो ।
यस्तै चार विद्यार्थी संगठनकै प्यानलबाट नेकपा (माओवादी केन्द्र) सम्वद्ध अनेरास्ववियु (क्रान्तिकारी) का मोहन राई (३८९ मतसहित) सचिवमा र कोषाध्यक्षमा संघीय लोकतान्त्रिक राष्ट्रिय मञ्चसम्वद्ध संघीय विद्यार्थी युनियनकी सुशीला शेर्पा ३४३ मत प्राप्त गरी निर्वाचित हुनुभएको छ । राईले सचिवका प्रत्यासी अनेरास्ववियुका संगम शेर्पा (५७ मत) र कोषाध्यक्षका प्रत्यासी अनेरास्ववियुकै अनिता हेल्लोक (९१ मत) लाई पराजित गर्दै शर्पा विजयी हुनुभएको हो ।
सदस्यतर्फ नेविसंघका डोल्मा शेर्पा (३७७) र विद्या देवान (३८१), अखिल क्रान्तिकारीका विजयदीप राई (३६८) र राज गुरुङ (३७२), नेकपा (एकीकृत समाजवादी) सम्वद्ध अनेरास्ववियुका खगेन्द्र दर्जी (३५५) तथा संघीय विद्यार्थीका विसन लिम्बू ३६७ मतसहित निर्वाचित हुनुभएको छ । सदस्य पदका प्रत्यासी अनेरास्ववियुका सनुजा गौतम, सूर्य शेर्पा र सोममाया गुरुङ, जनता समाजवादी पार्टी नेपालसम्वद्ध समाजवादी विद्यार्थी युनियनका सुनील लिम्बू, शोभा लिम्बू र लाजरस लिम्बू पराजित हुनुभएको छ ।
यता समानुपातिकतर्फ नेविसंघ, अखिल क्रान्तिकारी, संघीय विद्यार्थी र अनेरास्ववियु गठबन्धनले ३९० तथा अनेरास्ववियु र समाजवादी विद्यार्थी युनियन गठबन्धनले ५५ मत मात्र प्राप्त गरेको निर्वाचन समितिले जनाएको छ । पाथीभरा बहुमुखी क्याम्पस स्ववियु निर्वाचनका लागि कुल ९८४ मतदातामध्ये ४५५ अर्थात ४६.२३ प्रतिशत मत खसेको थियो ।