विश्व क्षयरोग दिवसमा ताप्लेजुङ कारागारका कैदीबन्दीलाई गराईयो अनुशिक्षण

ताप्लेजुङ,चैत १० । विश्व क्षयरोग दिवस २०२३ को अवसरमा ताप्लेजुङ कारागारमा रहेका कैदीबन्दीलाई क्षयरोग बिरुद्ध सचेतनामुलक अनुशिक्षण गराईएको छ ।

स्वास्थ्य कार्यालय र जिल्ला कारागार शाखा ताप्लेजुङको संयुक्त संयोजनमा कारागारमा रहेका कैदीबन्दीलाई अनुशिक्षण गराईएको स्वास्थ्य कार्यालय ताप्लेजुङका ल्याव टेक्निसियन इन्सपेक्टर गोपाल बरालले जानकारी दिनुभयो । जनस्वास्थ्य अधिकृत पशुपति खनालले कैदीबन्दीहरुलाई क्षयरोग,यसका लक्षण,रोग लाग्न नदिनका लागि अपनाइने सावधानी र बच्ने उपाय बारे जानकारी गराउनु भएको थियो । जिल्ला कारागार शाखाका प्रमुख कुलेन्द्र खवासका अनुसार अहिले ताप्लेजुङ कारागारमा १ सय ५३ जना कैदीबन्दी रहेका छन् ।‘हो हामी क्षयरोग अन्त्य गर्छौं’भन्ने नाराका साथ यसबर्षको विश्व क्षयरोग दिवस मनाइएको हो ।

जनस्वास्थ्य अधिकृत खनालका अनुसार क्षयरोग माइकोब्याक्टिरीयम ट्युबरक्युलोसिस नामक जीवाणुका कारण लाग्ने रोग हो । उक्त जीवाणुबाट प्रभावित मानिसले खोक्दा वा हाछ्युँ गर्दा निस्किने स–साना कणबाट अरू मानिसमा सर्ने सम्भावना उच्च रहन्छ । सङ्क्रमितमार्फत् जीवाणुहरू वातावरणमा निस्कने र त्यहँ रहेका निरोगीहरूले सास फेर्दा त्यो उनीहरूको शरीरमा प्रवेश गर्ने खनालले बताउनुभयो । त्यसरी प्रवेश गरेको जीवाणुले फोक्सोलाई प्रभावित पार्ने र त्यहीँमार्फत रोग विभिन्न अङ्गमा फैलने समेत उहाँले बताउनुभयो ।

‘घनाबस्ती वा बढी जनघनत्व भएको क्षेत्रमा कसैलाई संक्रमण भए धेरैमा चाँडो रुपले सर्ने जोखिम भएकोले यसपटक कारागारमा अनुशिक्षण गराएका हौं’खनालले भन्नुभयो । चिकित्सकका अनुसार नियमित औषधि सेवनले क्षयरोग सजिलै निको हुन्छ । पाँच वर्षमुनिका बालबालिका, मिर्गौला प्रत्यारोपण गरिएका व्यक्ति, सोरायोसिसका बिरामी, प्रतिरक्षा प्रणाली कमजोर भएका व्यक्ति तथा एचआईभीपीडित व्यक्तिपनि क्षयरोगको उच्च जोखिममा रहने चिकित्सकहरू बताउँछन् ।