पूर्वमन्त्री भट्टराईद्वारा अशक्त विद्यार्थीलाई सहयोग

–उज्यालो पोष्ट
ताप्लेजुङ, भदौ २१ । ताप्लेजङका प्रतिनिधिसभा सदस्य तथा पूर्व पर्यटनमन्त्री योगेशकुमार भट्टराईले शारीरिक रुपमा अशक्त (अपाङ्ग) विद्यार्थीलाई सहयोग गर्नुभएको छ । मङ्गलबार आफ्नो जन्मदिनको अवसरमा स्नातक तहमा अध्ययनरत एकजना अशक्त विद्यार्थीलाई आर्थिक सहयोग गर्नुभएको हो ।
नेकपा एमालेका सचिवसमेत रहनुभएका पूर्वमन्त्री भट्टराईले ताप्लेजुङस्थित पाथीभरा बहुमुखी क्याम्पसमा अध्ययनरत मैवाखोला गाउँपालिका–५ फाकुम्बाका जीवन वनेम लिम्बूलाई सहयोग गर्नुभएको छ । भट्टराईले लिम्बूको पढाइ खर्चका लागि २० हजार रुपियाँ र एकवर्षको कोठा भाडा शुल्कबापत २४ हजार गरी ४४ हजार रुपियाँ नगद सहयोग गर्नुभएको हो ।
विगतदेखि नै जन्मदिनको अवसरमा अपाङ्ग, अशक्त तथा असाह्यलाई सहयोग गर्दै आएको र यसवर्ष पनि जन्मदिनको अवसरमा अशक्त विद्यार्थीलाई आफूले सहयोग गरेको पूर्वमन्त्री भट्टराईले जानकारी दिनुभयो । आफूले गरेको आर्थिक सहायताले अशक्त विद्यार्थीको पढाइमा थोरै भए पनि सहयोग पुग्ने विश्वास लिएको उहाँको भनाइ छ । लिम्बू पाथीभरा बहुमुखी क्याम्पसमा शिक्षा संकायतर्फ स्नातक तह तृतीय वर्षमा अध्ययनरत हुनुहुन्छ ।