बिद्यालयलाई ‘बन्दमुक्त’गर्ने सहितका २० बुँदे घोषणा सहित आठराई त्रिबेणीद्धारा सयदिने उपलब्धी सार्वजनिक

खगेन्द्र अधिकारी
ताप्लेजुङ,भदौ १४ । पालिका भित्रका बिद्यालयलाई ‘बन्दमुक्त’गर्ने सहितका २० बुँदे घोषणा गर्दै ताप्लेजुङको आठराई त्रिबेणी गाउँपालिकाले नवनिर्वाचित जनप्रतिनिधिको सयदिने मुख्य उपलब्धी सार्वजनिक गरेको छ । सरकार सञ्चालनको सयदिनलाई ‘मधुमास’अवधि पनि भन्ने गरिन्छ ।

पालिका अध्यक्ष दीपन्द्र पोमू(दीपेन)ले पालिकाभरीका घरधुरीले घरायसी प्रयोजनका क्रममा खपत गर्ने बिद्युतलाई निःशुल्क गर्नका लागि कार्यविधि तयार गरिएको,पालिकाभित्रका सामुदायिक बिद्यालयमा अध्ययन गर्ने कक्षा ११ र १२ का बिद्यार्थीको अध्ययन शुल्क पालिकाले व्यहोरेर शुल्कवापतको रकम बिद्यालयलाई दिन थालिएको सहितलाई आफ्नो कार्यकालको प्रारम्भिक उपलब्धीको रुपमा उल्लेख गर्नु भएको छ । लामो समय देखि मानसिक रोगको शिकार भई बन्धनमा परिरहेका मानिसहरुको उद्धार तथा आर्थिक सहयाता सहित उपचार गर्न थालिएको,सुशासन प्रवद्र्धनका लागि कर्मचारीको कार्यप्रतिको अनुगमन र व्यवस्थापन कार्य अघि बढाइएको,शान्ति सुरक्षा प्रवद्र्धन र स्मार्टसिटी योजनालाई अघि बढाउन पालिकाका मुख्य–मुख्य स्थानहरुमा‘बुलेट’क्यामरा जडानका कार्य अघि बढाईएको र पालिकाभरीका ५ वटै वडाहरुमा बर्थिङ सेन्टर स्थापना गर्ने लक्ष्य अनुरुप आवश्यक कर्मचारी र भौतिक उपकरण व्यवस्थापन भइरहेको कार्यलाई पालिकाले उपलब्धीको रुपमा औंल्याएको छ ।

यस्तै असोज महिनाबाट सामाजिक सुरक्षाभत्ता वडाबाटै बितरण गर्नेगरी आवश्यक प्रकृया पूरा गरिएको,‘एक वडा,एक सामुदायिक भवन’बनाउने नीति अनुरुप आवश्यक पहल सुरु गरिएको,अवैधानिक ढंगले सञ्चालनमा रहेका क्रसरलाई नियन्त्रण गरिएको तथा काष्ठजन्य पदार्थको अवैध निकासीमा रोक लगाइएको गाउँपालिकाले बताएको छ । यस्तै प्रधानाध्यापकहरुको कार्यबोझलाई मध्यनजर गरी मासिक १ हजार ५ सय रुपैंयाका दरले प्रोत्साहन रकम उपलब्ध गराउन थालिएको,५ वटै वडामा फुटबलका पूर्ण खेलाडी(११ जना) नै रहेर खेल्न मिल्ने मैदान निर्माण गर्ने योजना अनुरुप वडा नं २ फुलवारीको महवीर खेल मैदानबाट अभियान सुरु गरिएको,पालिकाभित्रका ७ जना बिद्यार्थीलाई प्राविधिक बिषय अध्ययनमा जनही बार्षिक १ लाख रुपैंयाका दरले छात्रबृत्ति उपलब्ध गराउन थालिएको,स्वयंसेविकालाई मासिक ५ सय रुपैंका दरले प्रोत्साहनभत्ता उपलब्ध गराउन थालिएको र स्थानीय भाषा जर्गेनाका लागि पालिकाका सबै वडाहरुमा आनीपान भाषा शिक्षा सुरु गरिएको पालिकाले जनाएको छ ।

प्रशासनिक सुधार एवम् आर्थिक मितव्ययी अभियानलाई प्रभावकारी बनाउन खर्च मापदण्ड तयार गरिएको,पालिकाको स्रोत र साधनलाई व्यवस्थित उपयोग गर्न मापदण्ड तयार गरिएको,पालिकाको सेवालाई सहज र प्रभावकारी बनाउन कार्यपालिकामा सहयाता कक्ष्मा स्थापना गरिएको,पालिका भित्र निर्माण भएका सडकहरुमा अनिवार्य नाली बनाउने अभियान सुरु गर्दै कच्ची सडक स्तरोन्नती तथा पालिका,वडा र स्वास्थ्य संस्थाहरुमार्फत सुरुवात गरी सडकबत्ती जडान कार्यलाई अघि बढाइएको भन्दै गाउँपालिकाले सयदिने उपलब्धी सार्वजनिक गरेको छ ।