मैवाखोला गाउँपालिकाद्धारा वडा कार्यालयबाटै सामाजिक भत्ता प्रदान हुने,बितरणका लागि वडागत कार्यतालिका तयार

खगेन्द्र अधिकारी
ताप्लेजुङ,असार २८ । पालिका अध्यक्ष बिजयप्रकाश वनेमले पदभार ग्रहण पछि गरेको पहिलो निर्णय अनुरुप ताप्लेजुङको मैवाखोला गाउँपालिकाले अब वडा–वडा देखि नै सामाजिक सुरक्षा भत्ता बितरण गर्ने भएको छ ।

नयाँ आर्थिक बर्ष २०७९।२०८० को साउन २ गते देखि पालिकाका ६ वटै वडा कार्यालयमार्फत सामाजिक सुरक्षा भत्ता बितरणको प्रवन्ध गरिएको गाउँपालिकाले जनाएको छ । गाउँपालिकाका निमित प्रमुख प्रशासकीय अधिकृत(शिक्षा अधिकृत)लक्ष्मीमाया गोम्देनका अनुसार सामाजिक सुरक्षा भत्ताको चालू आर्थिक बर्षको तेस्रो चौमासिक किस्ता पालिकाका सबै वडा कार्यालयमार्फत बितरण गरिने छ । त्यसका लागि कार्यतालिका समेत बनेको गोम्देनले जानकारी दिनुभयो । उहाँका अनुसार वडा नं ६ फाकुम्बामा साउन २ र ३ गते तथा वडा नं ५ फाकुम्बामा साउन ४ र ५ गते तथा वडा नं १ ढुङ्गेसाँघुमा साउन ८ र ९ तथा वडा नं २ ढुङ्गेसाँघुमा १० र ११ गते बिहान १० बजेदेखि बेलुकी ५ बजे सम्म सासुभत्ता बितरण गरिने छ । यस्तै वडा नं ४ साँघुमा साउन १२ र १३ तथा वडा नं ३ साँघुपाटीमा १५ र १६ गते सासुभत्ता बितरण गरिने गाउँपालिकाले जनाएको छ । तत्कालिन ढुङ्गेसाँघु गाविसलाइ वडा नं १ र २,तत्कालिन साँघु गाविसलाइ वडा नं ३ र ४ तथा तत्कालिन फाकुम्बा गाविसलाइ वडा नं ५ र ६ हुने गरी मैवाखोला गाउँपालिकाका वडा बिभाजन गरिएको थियो ।

सासुभत्ता सम्वन्धित वडा कार्यालयमार्फत बितरण हुने व्यवस्था मिलाइएको गाउँपालिकाले जनाएको छ । मैवाखोला गाउँपालिकाको केन्द्र साँघुपाटीमा सनराइज बैंकको शाखा रहेको छ । यो बाहेक त्यहाँ अरु कुनै बैंक छैनन् । पालिकाको केन्द्रमा रहेको बैंकमार्फत सासुभत्ता बितरण हुँदा सेवाग्राहीलाइ आउन–जान झन्झट हुने र सासुभत्ता लिने क्रममा आउँदा–जाँदा अनावश्यक खर्च समेत हुने भन्दै गाउँपालिका अध्यक्ष वनेमले बिजयी पश्चात पदभार ग्रहणको क्रममा सामाजिक सुरक्षा भत्ता सम्वन्धित वडा कार्यालयमार्फत बितरण हुने व्यवस्था मिलाउने पहिलो निर्णय र घोषणा गर्नु भएको थियो । बैंकका कर्मचारी स्वयं उपस्थित भएर भत्ता बितरण हुनेगरीको प्रवन्धका लागि सनराइज बैंकका मैवाखोला शाखा प्रवन्धक देवी संग्रौला सहित स्थानीय प्रहरी चौकीका प्रमुख र पालिकाका कर्मचारीबीचको बैठकले कार्यतालिका तयार पारेको गाउँपालिकाले जनाएको छ ।