कोप्चे आगलागीमा ६९ लाख बढी क्षति

–उज्यालो पोष्ट
ताप्लेजुङ, फागुन २८ । ताप्लेजुङको सदरमुकाम फुङ्लिङमा भएको आगलागीबाट सवा उनन्सत्तरी लाख रुपियाँ बढी क्षति भएको छ । सदरमुकाम फुङ्लिङ बजारको कोप्चे गोसलाइनमा शुक्रबार भएको आगलागीबाट उक्त मूल्य बराबरको क्षति भएको हो ।
आगलागीबाट रविन आङ्बुहाङको एउटा कच्ची घर पूर्ण रुपमा क्षति भएको छ भने पक्की घरमा आंसिक क्षति पुगेको छ । यस्तै संगिता मादेनको कच्ची घर पनि जलेर पूर्ण रुपमा नष्ट भएको छ । आगलागीले आङ्बुहाङ र मादेनको दुईवटा कच्ची घर पूर्ण र एउटा पक्की घरमा आंसिक क्षति हुँदा कुल ६९ लाख ३० हजार रुपियाँ बराबरको धनसम्पत्ति जलेको छ ।
आगलागीमा तीन लाख २० हजार रुपियाँ जलेको छ भने बाँकी ६६ लाख १० हजार रुपियाँ बराबरको धनमाल जलेर नष्ट भएको छ । प्रमुख जिल्ला अधिकारी महेशकुमार पोखरेलका अनुसार घरधनी मादेनको १५ लाख रुपियाँ र आङ्बुहाङको १० लाख रुपियाँ बराबरको क्षति भएको छ । बाँकी क्षति भाडामा बस्नेहरुको भएको बताइएको छ ।
भाडामा बस्नेहरु कुमारी शेर्पा, कौशिला लिम्बू, रेनुका लिम्बू, जङ्ग शेर्पा, टङ्क अन्छङ्बो, कुमारी तामाङलगायत आठ परिवार रहेका छन् । घरधनी र भाडामा बस्ने परिवारकासमेत विस्थापित हुनेको सङ्ख्या २६ जना रहेको नेपाल रेडक्रस सोसाइटी ताप्लेजुङ शाखाले जनाएको छ । विस्थापित परिवार हाल छरछिमेकको शरणमा बसेका छन् । पीडितहरु कोठा व्यवस्थापनको कार्यमा जुट्दै आएका पनि बताइएको छ ।
यता अग्निपीडित परिवारलाई रेडक्रस सोसाइटीले राहतस्वरुप भाँडावर्तन र लत्ता कपडाजस्ता सामग्री वितरण गरेको छ भने ताप्लेजुङ उद्योग बाणिज्य सङ्घले खाद्यान्न सामग्री वितरण गरेको छ । सो आगलागीमा परी ६७ वर्षीया चुलीमाया चोङ्बाङ लिम्बूको मृत्यु भएको थियो । त्यस्तै १५ वर्षीया रेविना लिम्बूसहित केही व्यक्ति सामान्य घाइते भएका छन् ।