राष्ट्रपति शैक्षिक सुधार कार्यक्रममा ताप्लेजुङका ३९ विद्यालय छनोट

–अनिता पन्दाक
ताप्लेजुङ, फागुन ४ । राष्ट्रपति शैक्षिक सुधार कार्यक्रमका लागि ताप्लेजुङका उनन्चालीस विद्यालय छनोट भएका छन् । यस कार्यक्रमअन्तर्गत भवन निर्माण र आईसीटी ल्याब स्थापना गर्नका लागि जिल्लाका उक्त संख्यामा विभिन्न विद्यालय छनोट भएका हुन् ।
मंगलबार शिक्षा, विज्ञान तथा प्रविधिमन्त्री देवेन्द्र पौडेलको अध्यक्षतामा बसेको बैठकले चालू आर्थिक वर्षमा राष्ट्रपति शैक्षिक सुधार कार्यक्रमका लागि परेको आवेदनका आधारमा देशभरका चार हजार १५७ सामुदायिक विद्यालय छनोट गरेको हो । कार्यक्रमका लागि ताप्लेजुङमा सबैभन्दा बढी फुङ्लिङ नगरपालिकाका नौ वटा विद्यालय छनोट भएका छन् ।
जसमा युवावर्ष माध्यमिक विद्यालयमा चार कोठे भवन, शान्ति आधारभूत विद्यालय, बगरबारी आधारभूत विद्यालय, याङ्लिजुङ आधारभूत विद्यालय र फुङ्लिङ आधारभूत विद्यालयमा दुई कोठे भवन निर्माणका लागि छनोट भएका छन् । यस्तै जनता माध्यमिक विद्यालय, मयाम माध्यमिक विद्यालय र बाल सुबोधिनी संस्कृत माध्यमिक विद्यालयमा आईसीटी तथा भानुजन माध्यमिक विद्यालय ल्याब स्थापना गर्न छनोटमा परेका छन् ।
त्यस्तै सिदिङ्वा गाउँपालिकामा दुईवटा विद्यालय छनोट भएका र जसमध्ये इन्द्रावती आधारभूत विद्यालय साब्लाखुमा चार कोठे भवन र आँगेपा आधारभूत विद्यालय आँखोपमा दुई कोठे भवन निर्माण योजना परेको छ । सिरिजङ्घा गाउँपालिकामा सुदाप आधारभूत विद्यालयमा दुईकोठे भवन, दुर्गा माध्यमिक विद्यालयमा चार कोठे भवन तथा सिनाम माध्यमिक विद्यालय र कञ्चनजंघा माध्यमिक विद्यालयमा आईसीटीका लागि छनोट भएका छन् ।
आठराई त्रिबेणी गाउँपालिकामा सरस्वती माध्यमिक विद्यालय फुलबारी र जलकन्या आधारभूत विद्यालयलाई कोठे भवन, आम्बोटे आधारभूत विद्यालय, जनकल्याण आधारभूत विद्यालय र गुप्तेश्वर माध्यमिक विद्यालयलाई आईसीटी योजना परेको छ । त्यस्तै मैवाखोला गाउँपालिकामा महेन्द्र माध्यमिक विद्यालयलाई चार कोठे तथा जनकल्याण माध्यमिक विद्यालयलाई दुई कोठे भवन रहेको छ भने पाटीडाँडा माध्यमिक विद्यालय र नारायणी माध्यमिक विद्यालयलाई आईसीटी योजना रहेको छ ।
यसैगरी पाथीभरा याङ्वरक गाउँपालिकामा थेचम्बु माध्यमिक विद्यालयलाई चार कोठे र त्रिभुवन आधारभूत विद्यालयलाई दुई कोठे भवन योजना परेको छ । बाँकी चाक्सिबोटे माध्यमिक विद्यालय, कालिका माध्यमिक विद्यालय र सिद्धकुमारी आधारभूत विद्यालय आईसीटी योजनाका लागि छनोट भएका छन् । फक्ताङ्लुङ गाउँपालिकामा दुईवटा विद्यालय छनोटमा परेका र जसमा सिँवा माध्यमिक विद्यालयमा चार कोठे भवन तथा सुनदेवी माध्यमिक विद्यालयमा आईसीटी योजना रहेको छ ।
उता मेरिङ्देन गाउँपालिकामा सिंहकाली माध्यमिक विद्यालय, सुर्के माध्यमिक विद्यालय र जालपा आधारभूत विद्यालयलाई चार कोठे भवन तथा त्रिभुवन माध्यमिक विद्यालयमा आईसीटी र पृथ्वी माध्यमिक विद्यालयमा ल्याब योजना परेको छ । मिक्वाखोला गाउँपालिकामा भने बाल्देन माध्यमिक विद्यालयमा चार कोठे र ओझागाउँ आधारभूत विद्यालयमा दुई कोठे भवन निर्माणका लागि छनोट भएका छन् । त्यस्तै पञ्चेश्वरी माध्यमिक विद्यालय आईसीटीका लागि छनोटमा परेको छ ।
राष्ट्रपति शैक्षिक सुधार कार्यक्रममा छनोट भएका विद्यालयलाई चारकोठे भवन निर्माणका लागि प्रतिविद्यालय ३६ लाख रुपैयाँ, दुईकोठे भवनलाई १८ लाख, आइसिटी ल्याब व्यवस्थापनका लागि छ लाख ५० हजार र ल्याब व्यवस्थापनका लागि प्रतिविद्यालय १० लाख रुपैयाँ सरकारले अनुदान उपलब्ध गराउने छ ।