भ्रष्टाचारीलाई आजीवन काराबास गर्नुपर्छः पालुङ्वा

–प्रयास लिम्बू
ताप्लेजुङ, पुस २२ । राष्ट्रिय जनमुक्ति पार्टीका अध्यक्ष खड्गप्रसाद पालुङ्वाले भ्रष्टाचारीलाई आजीवन काराबास गर्नुपर्ने बताउनुभएको छ । लामो समय लाभको पदमा बसेर वा अन्य तवरबाट अकुत सम्पत्ति कमाउने भ्रष्टाचारीलाई आजीवन काराबास गर्नुपर्ने पालुङ्वाले बताउनुभएको हो ।
राष्ट्रिय जनमुक्ति पार्टीको ‘जनता जागौं’ अभियानअन्तर्गत बिहीबार सदरमुकाम फुङ्लिङमा आयोजित पत्रकार भेटघाट कार्यक्रममा अहिले भ्रष्टाचार मौलाएको बताउँदै यसको न्युनिकरणको आवश्यक रहेको पालुङ्वाले बताउनुभयो । भ्रष्टाचारसँगै देशमा मौलाएको बेथितिमुलक क्रियाकलापको अन्त्य गर्नका लागि आफ्नो पार्टीले जनता जागौं अभियान सुरु गरेको पनि उहाँले बताउनुभयो ।
“बेथितिले देश संकटमा छ, आर्थिक रुपले पनि देश जर्जर छ, यस्तो अवस्था अन्त्यका लागि राष्ट्रिय जनमुक्ति पार्टीले निरन्तर खबरदारी गर्दै आएको छ” पालुङ्वाले भन्नुभयो । भ्रष्टाचार र बेथिति बढ्नुमा सत्ताधारी दल र सरकार जिम्मेवार भएको पनि उहाँले आरोप लगाउनुभयो । उहाँले लामो समय लाभको पदमा बसेर अकुल सम्पत्ति कमाउने, भ्रष्टाचार गर्ने वा अन्य शासकको सम्पत्ति छानबिन गर्नुपर्ने बताउनुभयो । सम्पत्ति छानबिन गरी भ्रष्टाचार खुलेको सम्पत्ति राष्ट्रियकरण गर्नुपर्ने र भ्रष्टाचारीलाई आजीवन काराबास गर्नुपर्ने तर्क गर्नुभयो ।
भ्रष्टाचारको अन्त्य भएमा देशले विदेशी अनुदान तथा ऋण कुनैपनि सहयोग लिनुनपर्ने पनि उहाँले बताउनुभयो । ऋण र अनुदान घातक रोग भएको संज्ञा दिँदै उहाँले कुनैपनि खालको विदेशी सहयोग लिन नहुने बताउनुभयो । उहाँले मिलेनियम च्यालेन्ज कर्पोरेसन (एमसीसी) पनि भ्रष्टाचारलाई नै बढावा दिने खालको योजना भएको बताउनुभयो ।
उहाँले भन्नुभयो, “एमसीसी विकास गर्ने बजेट होइन, भ्रष्टाचारीले बाँढेर खाने योजना हो, त्यसैले राष्ट्रिय जनमुक्ति पार्टीले विरोध गरिरहेको छ ।” त्यस्तै चीनलाई अप्ठ्यारोमा पार्ने, भारतलाई सन्तुलनमा राख्ने र नेपालमा भएको युरोनियम लगायत बहुमूल्य वस्तुको उत्खनन् गरेर लैजाने अमेरिकाको योजना भएकाले आफ्नो पार्टी एमसीसीको विरोधमा रहेको उहाँको भनाइ थियो ।
यसरी हालको बढ्दो बेथिति र आर्थिकसँगै शैक्षिक, नैतिक, बौद्धिक, नीतिगतजस्ता भ्रष्टाचारविरुद्ध जनतालाई जागरुक बनाउन जनमुक्तिले पहिलो चरणको तीन महिने ‘जनता जागौं’ अभियानको सुरुवात गरेको अध्यक्ष पालुङ्वाले बताउनुभयो । यससँगैस्थापना कालदेखि नै पार्टीको असमान सन्धिहरु खारेज गर्ने मुद्दा, बहुल राष्ट्रवादी पार्टीको रुपमा जनमुक्तिलाई स्थापित गर्ने मुद्दा, संघीय शासन प्रणाली, जाती तथा समुदायको पहिचान र अधिकार सुनिश्चित गर्ने मुद्दा साथै पूर्ण समानुपातिक निर्वाचन प्रणाली आदि विषयमा जनतालाई सुसूचित गर्ने योजनाका साथ अभियान सुरु गरेको पनि जनमुक्तिले जनाएको छ ।
कार्यक्रममा राष्ट्रिय जनमुक्ति पार्टीका केन्द्रीय उपाध्यक्ष प्रकाश येङ्देन, महासचिव पदमबहादुर जबेगु लगायत केन्द्र तथा जिल्लास्तरीय नेता कार्यकर्ताको सहभागिता रहेको थियो । यता जनता जागौं अभियानअन्तर्गत ताप्लेजुङमा अन्य राजनीतिक दलसँग छलफल, गाउँगाउँका जनतासँग छलफल, अन्तर्क्रिया लगायतका कार्यक्रमहरु सञ्चालन हुने जिल्ला अध्यक्ष इन्द्र थलङले जानकारी दिनुभयो ।