पाथीभरा याङ्वरकद्धारा सेवानिवृत्त शिक्षक,एसईई परीक्षामा उत्कृष्ट अंक ल्याउने बिद्यार्थी र बिद्यालय पुरस्कृत
खगेन्द्र अधिकारी
ताप्लेजुङ,भदौ २४ । ताप्लेजुङको पाथीभरा याङ्वरक गाउँपालिकाले सेवानिवृत्त शिक्षक,एसईई परीक्षामा उत्कृष्ट अंक ल्याउने बिद्यार्थी र बिद्यालयलाइ पुरस्कृत तथा सम्मान गरेको छ । ४२ औं शिक्षा दिवस तथा अन्तराष्ट्रिय सारक्षता दिवसको अवसरमा ७ सेवानिवृत्त शिक्षक,एसईई परीक्षामा उत्कृष्ट अंक ल्याउने ३ बिद्यार्थी र २ बिद्यालयलाइ पुरस्कृत गरिएको गाउँपालिकाका निमित्त शिक्षा अधिकृत भीमप्रसाद दाहालले जानकारी दिनुभयो । गाउँपालिका अध्यक्ष केशरकुमार सुब्बा र उपाध्यक्ष रनमाया गुरुङले सेवानिवृत्त शिक्षक,उत्कृष्ट बिद्यार्थी र बिद्यालयलाइ सम्मान तथा पुरस्कार प्रदान गर्नु भएको छ । दाहालका अनुसार २०७७ सालको एसईई परीक्षामा उत्कृष्ट नतिजा ल्याउने वडा नं १ नाङ्खोल्याङको कालिमा मावि समग्रमा पहिलो हुँदै २८ हजार रुपैंया नगदका सम्मानित भएको छ । बिद्यालयका प्रधानाध्यापक भक्तिप्रसाद निरौलालाइ पालिका अध्यक्ष सुब्बाले नगद तथा सम्मानपत्र प्रदान गर्नु भएको छ ।
यस्तै वडा नं २ मा अवस्थित थेचम्बु माध्यमिक बिद्यालय उत्कृष्टताको क्रममा दोस्रो हुँदै नगद २२ हजार रुपैंयाका साथ पुरस्कृत भयो । पालिका उपाध्यक्ष गुरुङले थेचम्बु माविका प्रअ देउप्रसाद मेन्याङ्वोलाइ नगद पुरस्कार तथा प्रमाणपत्र प्रदान गर्नु भएको छ । पालिकाले २०७७ सालको एसईई परीक्षामा उत्कृष्ट अंक ल्याउने ३ बिद्यार्थीलाइ नगद र प्रमाणपत्र सहित पुरस्कृत गरेको छ । एसईई परीक्षामा उत्कृष्ट अंक ल्याउने १ छात्र र १ छात्रालाइ पुरस्कृत गर्ने पालिकाको योजना रहेकोमा दुई छात्रको नतिजा बराबर भएपछि उसले ३ बिद्यार्थीलाइ समान नगद सहित पुरस्कृत गरेको हो ।
पुरस्कृत हुनेमा छात्रतर्फ कालिका मावि नाङ्खोल्याङका पारस बर्देवा र थेचम्बु मावि थेचम्बुका समिर कार्की रहनु भएको छ । उहाँहरुले एसईई परीक्षामा ३.५० जिपीए प्राप्त गर्नु भएको थियो । यस्तै छात्रातर्फ कालिका मावि नाङ्खोल्याङका क्षितिजा दुर्विच रहनु भएको छ । उहाँले ३.४५ जिपीए प्राप्त गर्नु भएको थियो । पुरस्कृत हुने ३ नै जनाले समान १६ हजार ५ सय रुपैंया नगद र प्रमाणपत्र पाउनु भएको छ । पालिकाले सेवानिवृत्त ७ शिक्षकहरुलाइ नगद १० हजार रुपैंया,दोसल्ला र प्रमाणपत्र बितरण गरेको छ । यो सम्मान पाउनेमा लोकनाथ खतिवडा,बालकृष्ण श्रेष्ठ,घनश्याम पौडेल,केदारलाल न्यौपाने,समतलाल चौधरी,कृष्णप्रसाद अधिकारी र सन्तोषकुमार राजभण्डारी रहनु भएको छ ।
कार्यक्रममा आफ्नो धारणा राख्दै पालिका अध्यक्ष सुब्बाले पालिका क्षेत्रको शैक्षिक उन्नयनका लागि आफुहरुले सक्दो योगदान दिदैं आएको र अब बिशेष कार्ययोजनाका साथ अघि बढ्ने बताउनुभयो । पुरस्कृत बिद्यालयकोतर्फबाट कुरा राख्दै कालिक मावि नाङखोल्याङका निरौलाले पुरस्कारले आफुहरुको शैक्षिक दायित्व बढाएको बताए । सेवानिवृत्त शिक्षक बालकृष्ण श्रेष्ठले आफुहरुले लामो समय सम्म शैक्षिक क्षेत्रमा जीवन बिताउँदा पाएको अनुभव पालिका क्षेत्रको शैक्षिक विकासमा खर्चिने प्रतिबद्धता जनाउनुभयो ।
