ताप्लेजुङमा सक्रिय कोरोना संक्रमितको संख्या करिव ११ प्रतिशतमा झ¥यो,फुङलिङ र पाथीभरा याङ्वरक बढी प्रभावित

खगेन्द्र अधिकारी
ताप्लेजुङ,भदौ ८ । ताप्लेजुङमा सक्रिय कोरोना संक्रमितको संख्या करिव ११ प्रतिशतमा झरेको छ । यहाँका ९ वटै स्थानीय तह तथा स्वास्थ्य कार्यालयसंगको परामर्शमा जिल्ला प्रशासन कार्यालयले मंगलवार मध्यान्ह प्रकाशित गरेको बिबरण अनुसार यहाँ २ सय ६९ जना सक्रिय संक्रमित रहेका छन् । कोरोना दोस्रो भेरिएन्ट सुरु भएयता २ हजार ३ सय ६७ जनामा संक्रमण देखिएकोमा २ हजार ८२ जना संक्रमणमुक्त भएको जिल्ला प्रशासन कार्यालयले जनाएको छ । सहायक प्रमुख जिल्ला अधिकारी गायत्रा अधिकारी खड्काका अनुसार संक्रमितमध्ये ६ जना ताप्लेजुङ जिल्ला अस्पतालले सञ्चालन गरेको कोभिड अस्पतालमा उपचार गराइरहेका छन् । ६ जनाकै अवस्था सामान्य रहेको प्रशासन कार्यालयले जनाएको छ । ४ जनालाइ थप उपचारका लागि जिल्ला बाहिर रेफर गरिएको र २ सय ५९ जना होम आइसोलेसनमै रहेर स्वास्थ्यलाभ गरिरहेको प्रशासन कार्यालयले जनाएको छ । कोरोनाको दोस्रो भेरिएन्ट सुरु भएयता ताप्लेजुङमा ७ हजार ५७ जनाको एन्टीजेन र २ हजार २ सय ८८ जनाको पीसीआर गरी कूल ९ हजार ३ सय ४५ जनाको परीक्षण गरिएको छ । प्रशासन कार्यालयले सक्रिय संक्रमितको संख्या २ सयमा झर्ने बित्तिकै जारी निशेधाज्ञा हटाउने तयारी गरिरहेको छ । प्रमुख जिल्ला अधिकारी उमेश पाण्डेले सक्रिय संक्रमितको संख्या २ सय वा सो भन्दा कम भएको अवस्थामा निशेधाज्ञा हटाउने तयारी भइरहेको जानकारी दिनुभयो । प्रशासन कार्यालयले मंगलवार मध्यरात देखि लागु हुनेगरी भदौ १५ को मध्यराती सम्मका लागि सोमवार निशेधाज्ञा थप गरेको छ ।

फुङ्लिङ नगरपालिका र पाथीभरा याङ्वरकमा बढी संक्रमण
पछिल्लो समय पाथीभरा याङ्वरक गाउँपालिकामा कोरोना सक्रिय संक्रमितको संख्या बढीरहेको छ । त्यहाँ गाउँपालिका अध्यक्ष केशरकुमार सुब्बा आफैं संक्रमित हुनुहुन्छ । पाथीभरा याङ्वरकमा १ सय २ जना संक्रमित रहेको प्रशासन कार्यालयले जनाएको छ । ताप्लेजुङ जिल्ला अस्पतालमार्फत परीक्षण भएका १ सय ८,फुङ्लिङ नगरपालिका आफैंले परीक्षण गरेका ६ सानिमा हाइड्रोपावरमा रहेका १ सहित गरी फुङ्लिङ नगरपालिका भित्र १ सय १५ जना सक्रिय संक्रमित देखिएका छन् । यि बाहेक आठराइ त्रिबेणी र मैवाखोला गाउँपालिकामा ४–४ जना,मेरिङ्देन र मिक्वाखोला गाउँपालिकामा ६–६ जना,फक्ताङ्लुङ गाउँपालिकामा १ जना,सिदिङ्वा गाउँपालिकामा १९ र सिरिजंगा गाउँपालिकामा १२ जना सक्रिय संक्रमित रहेको प्रशासन कार्यालयले जनाएको छ ।