ऋणी सदस्यप्रति उत्तरदायी बन्दै बित्तीय संस्था,न्युन रकम प्रिमियममा बीमा गराएर समिटले दियो १ लाख ७५ हजार मृत्यु दावी भुक्तानी

खगेन्द्र अधिकारी
ताप्लेजुङ,असार ३० । बित्तीय संस्थाहरुले पनि आफ्ना ऋणी सदस्यलाइ न्यून रकम प्रिमियम जम्मा गर्न लगाएर जीवन जोखिम बहन गर्न बीमा गराउन थालेका छन् । यो प्रकृयाका कारण बीमित व्यक्तिको मृत्यु भइहाले परिवारका सदस्यलाइ बीमा बापतको रकम प्राप्तिले राहत मिल्ने अवस्था देखिन थालेको छ । यस्तै प्रकृया अपनाएको ताप्लेजुङ सदरमुकाम फुङलिङस्थित समिट लघु बित्त वित्तीय संस्था लिमिटेडले आफ्ना एक ऋणी सदस्यको मृत्यु पछि दावी भुक्तानी गरिदिएर पीडित परिवारको पींडामा मल्हम लगाउने प्रयास गरेको छ । न्यून रकम प्रिमियम तिरेपछि भएको म्यादी बीमाले परिवारका सदस्यको पींडामा थोरै भएपनि सान्त्वना पाउन सहयोगी बनेको समिट लघु बित्त वित्तीय संस्था लिमिटेड ताप्लेजुङका शाखा प्रवन्धक टेकनाथ अधिकारीले जानकारी दिनुभयो । अधिकारीका अनुसार समिटका ऋणी सदस्य फुङलिङ नगरपालिकाका वडा नं ९ हाङ्देवाका फुर्लमु शेर्पाका परिवारलाइ बीमा र किरिया खर्च बापत समिटले १ लाख ७५ हजार रुपैंया हस्तान्तरण गरेको छ ।

२०७१ सालबाट समिटको कर्जा अभियानमा सहभागी फुर्लमुको गत जेठ २७ गते निधन भएको थियो । २०७७ साल माघ ४ गते समिटको समन्वयमा नेस्नल लाइफ इन्स्योरेन्स कम्पनी लिमिटेडमा १ लाख ५० हजार बराबरको म्यादी बीमा गरिएका फुर्लमुको मृत्यु पछि बीमा बापतको रकममा समिटले २५ हजार रुपैंया थप गरी उहाँका आफन्तलाइ १ लाख ७५ हजार रुपैंया हस्तान्तरण गरेको अधिकारीले जानकारी दिनुभयो । समिटले कोरोनाबाट प्रभावित ऋणीहरु राहत प्रदान गर्न जेठ र असार महिनामा कायम रहने ब्याज रकममा १० प्रतिशत छुट दिने नीति समेत लिएको अधिकारीले जानकारी दिनुभयो । करिव १ हजार १ सय सदस्य रहेको समिटले फुङ्लिङमा २०७० साल देखि सेवा प्रवाह गर्दै आइरहेको छ ।