नगर तथा गाउँपालिका महासंघद्धारा सरकारको ध्यानाकर्षण ः स्थानीय तहलाइ आर्थिक दायित्व बढ्ने भो,सर्सत अनुदान समानीकरणमा रकम थप गरी पठाउ

खगेन्द्र अधिकारी
ताप्लेजुङ,असार १ । बित्तीय समानीकरण अनुदानमा बृद्धि नगरी स्थानीय तहलाइ अत्यधिक आर्थिक दायित्व पर्ने कार्यक्रम कार्यान्वयन गर्न बाध्य पारेको भन्दै गाउँपालिका राष्ट्रिय महासंघ तथा नगरपालिका संघले नेपाल सरकारको ध्यानाकर्षण गराएका छन् । गाउँपालिका राष्ट्रिय महासंघ तथा नगरपालिका संघले संघीय सरकारका अर्थमन्त्री बिष्णुप्रसाद पौडेलाइ सम्बोधन गरी लेखेको संयुक्त ध्यानाकर्षण पत्रमा बित्तीय समानीकरण अनुदानमार्फत स्थानीय तहलाइ अत्यधिक आर्थिक दायित्व पर्ने कार्यक्रम अहिलेकै अवस्थामा कार्यान्वयन गर्न बाध्य नहुने चेतावनी पनि दिएका छन् ।

गाउँपालिका राष्ट्रिय महासंघका अध्यक्ष होमनारायण श्रेष्ठ र नेपाल नगरपालिका संघका अध्यक्ष अशोककुमार ब्याञ्जु श्रेष्ठद्धारा हस्ताक्षरित ध्यानाकर्षण पत्रमा बित्तीय समानीकरणमा खासै बृद्धि नभएको अवस्थामा आर्थिक बर्ष २०७८।०७९ का लागि प्रस्तुत बजेट बक्तब्यका कतिपय प्रावधानले स्थानीय सरकारलाइ थप दायित्व सृजना हुने दावी गरिएको छ । वाल विकास सहजकर्ता र बिद्यालय कर्मचारीको तलव बृद्धि लगायत घोषणा गरिएका केहि कार्यक्रमहरुले स्थानीय तहमा ठूलो बित्तीय दायित्व बढ्न जाने देखिएको भन्दै गाउँपालिका राष्ट्रिय महासंघ तथा नगरपालिका संघले यस्ता कार्यक्रमको दायित्व सर्सत अनुदान समानीकरणमा थप गरी पठाउन समेत अर्थमन्त्री पौडेलको ध्यानाकर्षण गरेको छ ।