कोरोना बिरुद्धको खोप लगाउने हो ? आजै अनलाइन फारम भरिहाल्नुहोस्

खगेन्द्र अधिकारी
ताप्लेजुङ,१ जेठ । सरकारले कोरोना बिरुद्धको खोप नलगाएका १८ बर्ष वा सो भन्दा बढी उमेरका खोप लगाउन इच्छुक व्यक्तिहरुलाइ अनलाइन फारम भर्न आवहन गरेको छ । आबेदन फारमबाट प्राप्त भएका बिबरणका आधारमा पालिका स्तरमा खोपसंग सम्वन्धित योजना तथा व्यवस्थापन गर्नका लागि सहज हुने पनि सरकारले आंकलन गरेको छ । स्वास्थ्य तथा जनसंख्या मन्त्रालयले आगामी दिनमा १८ बर्ष वा सो भन्दा माथिका झण्डै २ करोड नेपाली नागरिकलाइ कोभिड खोप दिन पर्ने र उक्त समूह निकै ठूलो भएकोले अभियानको क्रममा दर्ता गर्न निकै कठिनाइ हुने भन्दै सरकारले पूर्व दर्ताका लागि आपहन गरेको हो । स्वास्थ्य तथा जनसंख्या मन्त्रालयले ७ वटै प्रदेशका स्वास्थ्य निर्देशनालय र ७७ वटै जिल्लाका स्वास्थ्य कार्यालयलाइ परिपत्र गर्दै समयको बचत र अभियानको प्रभावकारिताका लागि पूर्व दर्ता प्रणाली सुरु गरेको जनाएको छ । जस अन्र्तगत अनलाइन फारम भरेका १८ बर्ष वा सो भन्दा बढी उमेरका व्यक्तिहरुले प्राथमिकता र खोपलगाउन पाउने सरकारले जनाएको छ । उक्त कार्यका लागि www.vaccine.mohp.gov.np मा लगइन गरी आफ्नो बिबरण अद्यावधिक गराउन र दर्ता नम्बर दिन पनि सबैलाइ आग्रह गरेको छ । यो एक स्वैच्कि आबेदन फारम भएकोले यसको महत्व बुझ्न समेत सरकारले सबैलाइ भनेको छ । तर,यो फारम भर्ने बित्तिकै खोप लगाउने सुनिश्चितता भने नरहने समेत सरकारले प्रष्ट्याएको छ । इन्टरनेटको पहुँच नभएका पालिकाका वडाहरुमा स्वास्थ्य संस्थामा रजिष्ट्रर राख्न लगाइ पहिले नै दर्ता गर्ने र पालिकाका ल्याइ प्रबिष्टी गर्ने व्यवस्था मिलाउन समेत सरकारले देशभरका पालिकाहरुलाइ आग्रह गरेको छ । रजिष्ट्रर बिबरण दर्ता गर्दा खोप कार्डमा भएको बिबरण अनुसार मात्र दर्ता गर्न र इन्टरनेटको पहुँच भएका ठाउँहरुमा तत्काल आफ्नो बिबरण प्रिन्ट गरी सुरक्षित राख्न समेत सेवाग्राहीहरुलाइ आग्रह गरेको छ । अभियानको समयमा सबै खोप केन्द्रहरुमा इन्टरनेटको पहुँच नहुने भएकोले अनिवार्य रुपमा रजिष्ट्रर राख्न लगाउने र पछि संस्था वा पालिकामा लगि अनलाइन प्रबिष्टी गर्ने व्यवस्था मिलाउन समेत परिपत्र गरिएको छ । अनलाइन दर्ता गर्नेहरुको हकमा खोप अ अभियानको बेला प्राथमिकतामा राखी खोप लगाउने व्यवस्था गर्ने समेत सरकारले प्रष्ट्याएको छ । तर,अनलाइन दर्ता नभएकै आधारमा खोपबाट बञ्चित नगर्ने योजना समेत सरकारले सार्वजनिक गरेको छ ।