वातावरणमैत्री योजना बनाउने प्रतिवद्धता

– उज्यालो पोष्ट
ताप्लेजुङ, चैत १२ । ताप्लेजुङका स्थानीय तहले सडक निर्माण लगायत योजनाहरु वातावरणमैत्री बनाउने प्रतिवद्धता जनाएका छन् । हालको सङ्घीय संरचनासँगै विकासको गतिले फड्को मारिरहेको अवस्थामा योजना निर्माण तथा कार्यान्वयन गर्दा वातावरणमैत्री योजनातर्फ जोड दिने स्थानीय तहका प्रमुखहरुले प्रतिवद्धता जनाएका हुन् ।
विश्व वन्यजन्तु कोष (डब्लुडब्लुएफ) अन्तर्गत तीनजुरे–मिल्के–जलजले क्षेत्र संरक्षण आयोजनाले सञ्चालन गरेको ग्रिनरोड इन्जिनियरिङ तालिमको समापनमा सहभागी स्थानीय तहका प्रमुखहरुले वातावरणमैत्री बनाउने प्रतिवद्धता जनाउनुभएको हो । तीब्र विकास निर्माणका कारण भू–क्षयसँगै वन जङ्गल विनासको क्रम बढिरहेको अवस्थामा वातावरणमैत्री योजना निर्माण तथा कार्यान्वयन गर्नुको विकल्प नभएको उहाँहरुको भनाइ छ ।
पाथीभरा याङ्वरक गाउँपालिकाका अध्यक्ष केशरकुमार सुब्बाले सडक निर्माण गर्दा सबैभन्दा बढी वातावरणमा असर पुगिरहेको बताउनुभयो । पछिल्लो समय प्रत्येक स्थानीय तहका गाउँ–गाउँमा सडक निर्माणका कार्यहरु भइरहेको र सडक निर्माणले वन जङ्गल मासिनुका साथै पहिरोको जाखिम बढेको सुब्बाले बताउनुभयो । विकास योजना कार्यान्वयनले मानव तथा प्राणी जगतमा प्रत्यक्ष असर पुग्नेगरी कार्य भइरहेकाले अब वातावरणमैत्री योजना नबनाए थप समस्या हुने उहाँले बताउनुभयो ।
जिल्ला समन्वय समिति प्रमुख घनेन्द्र मादेनले वातावतरणमैत्री योजना कार्यान्वयनतर्फ ध्यान नदिए मानव तथा प्राणीको अस्तित्वमा नराम्ररी असर पुग्ने बताउनुभयो । प्रमुख मादेनले पछिल्लो समय जताभावी सडक खन्ने कार्यले सबैभन्दा बढी वातावरणमा असर पुगेको बताउँदै सन्तुलित वातावरणका लागि वातावरणमैत्री योजना बनाउन स्थानीय तह नै बढी जिम्मेवार हुनुपर्ने उहाँले बताउनुभयो ।
सडक लगायतका योजनाको प्राविधिक तथा इन्जिनियरले विस्तृत परियोजना प्रतिवेदन (डीपीआर) बनाउँदा नै वातावरणतर्फ ध्यान नदिने गरेको पाइएको बताउँदै मादेनले यसतर्फ स्थानीय तहका नेतृत्व तथा कार्यान्वयन पक्षले ध्यान दिनुपर्ने बताउनुभयो । उहाँले योजना निर्माण गर्ने पक्ष तथा डीपीआर बनाउने प्राविधिक नै वातावरणमैत्री योजनाका लागि जिम्मेवार हुनुपर्ने पनि बताउनुभयो । यता ग्रिनरोड इन्जिनियरिङ तालिमले हाल आफ्नो कार्यक्षेत्रमा कार्यरत इन्जिनियर तथा प्राविधिकलाई क्षमता र सीम अभिवृद्धि गर्न सघाउ पुग्ने विश्वास पनि उहाँले गर्नुभयो ।
यता वातावरणीय सन्तुलन कायम राख्ने खालको योजना कार्यान्वयनमा सहयोग पु¥याउने र यसका लागि सरोकारवाला पक्षलाई प्रोत्साहित गर्ने उद्देश्यले तालिम आयोजना गरिएको तीनजुरे–मिल्के–जलजले क्षेत्र संरक्षण आयोजनाका प्रवन्धक सुमित गौतमले बताउनुभयो । अहिले देशभरका सबै स्थानीय तहले विकासको पहिलो खुड्किलोको रुपमा सडक निर्माणलाई लिएका कारण सडक योजनालाई दृष्टिगत गरी तालिम सञ्चालन गरिएको पनि गौतमले जानकारी दिनुभयो ।
गएको सोमबारदेखि बिहीबार सम्मको चारदिने तालिममा ताप्लेजुङका नौवटै स्थानीय तहमा कार्यरत इञ्जिनियर तथा प्राविधिकहरुको सहभागिता रहेको थियो । तालिमको सहजीकरण डब्लुडब्लुएफ नेपालका बरिष्ठ कार्यक्रम अधिकृत प्रमोद न्यौपाने, हरित सडक निर्माण बिषयमा विज्ञ शिवराज अधिकारी लगायतले सहजीकरण गर्नुभएको थियो । तालिमका सहभागीलाई जिल्ला समन्वय समिति प्रमुख मादेन, पाथीभरा याङ्वरक गाउँपालिका अध्यक्ष सुब्बा, आठराई त्रिबेणी गाउँपालिका अध्यक्ष विश्वनाथ सिटौला, मिक्वाखोला गाउँपालिका अध्यक्ष रामकुमार साँबा, मेरिङ्देन गाउँपालिका अध्यक्ष गणेशबहादुर लिम्बू, सिदिङ्वा गाउँपालिका अध्यक्ष नरबहादुर कडरिया लगायतले प्रमाणपत्र वितरण गर्नुभएको थियो ।