ढुङ्गाले किचेर बालकको मृत्यु

–उज्यालो पोष्ट
ताप्लेजुङ, बैशाख २७ । ताप्लेजुङको फुङ्लिङ नगरपालिकामा माथिबाट झरेको ढुङ्गाले किचेर एक बालकको मृत्यु भएको छ । फुङ्लिङ नगरपालिका–७ दोखुको बहानन्दे नजिक माथिबाट माटोको ढिस्कासहित झरेको ढुङ्गाले किचेर मेरिङ्देन गाउँपालिका–२ सान्थाक्राका १३ वर्षीय बालक फूर्वा शेर्पाको मृत्यु भएको हो ।
जिल्ला प्रहरी कार्यालय ताप्लेजुङका अनुसार सोमबार दिउँसो करिब साढे २ बजेतिर आफ्ना अभिभावकसँगै गिटी कुट्ने काम गर्ने क्रममा अचानक झरेको ढुङ्गाले किचेर घटनास्थलमै शेर्पाको मृत्यु भएको हो । प्रहरीका अनुसार फुङ्लिङ नगरपालिका ७ दोखुस्थित सडकको सव–वेश निर्माण कार्यका लागि बाबु पासाङ छिरिङ शेर्पासँगै बालकले पनि गिटी कुट्ने ढुङ्गा ओसार्न सघाउँदै आएका थिए ।