-प्रयास लिम्बू
ताप्लेजुङ, फागुन १३ । आइतबारदेखि देशव्यापी रुपमा सुरु भएको दादुरा–रुबेला राष्ट्रिय खोप अभियान ताप्लेजुङमा भने आउँदो शुक्रबारदेखि सञ्चालन हुने भएको छ । स्वास्थ्य कार्यालय ताप्लेजुङका अनुसार फागुन १८ गते शुक्रबारदेखि जिल्लामा दुई चरणमा दादुरा–रुबेला खोप अभियान सञ्चालन हुने भएको हो ।
स्वास्थ्या कार्यालयले आइतबार सदरमुकाम फुङ्लिङमा जिल्लास्तरीय दादुरा–रुबेला खोप अभियान तयारी तथा नियमित खोप सुदृढीकरणबारे अभिमुखीकरण आयोजना गरी खोप कार्यक्रमबारे जानकारी गराएको हो । स्वास्थ्य कार्यालय ताप्लेजुङका प्रमुख युगराज घिमिरेले नौवटा स्थानीय तह रहेको जिल्लामा दुई चरणमा खोप अभियान सञ्चालन गर्ने तयारी गरिएको जानकारी दिनुभयो ।
उहाँकाअनुसार पहिलो चरणमा फागुन १८ देखि २२ गतेसम्म सदरमुकामस्थित फुङ्लिङ नगरपालिका, सिदिङ्वा गाउँपालिका, सिरिजंघा गाउँपालिका र पाथीभरा याङ्वरक गाउँपालिकामा अभियान सञ्चालन गरिने छ । त्यस्तै दोस्रो चरणमा फागुन २४ देखि २८ गतेसम्म आठराई त्रिबेणी गाउँपालिका, मैवाखोला गाउँपालिका, मेरिङ्देन गाउँपालिका, मिक्वाखोला गाउँपालिका र फक्ताङ्लुङ गाउँपालिकाका दादुरा–रुबेला खोप अभियान सञ्चालन हुने छ ।
प्रत्येक वडामा पाँचवटा खोप केन्द्र सञ्चालन गरी सम्बधित वडा तथा टोलका बालबालिकालाई दादुरा–रुबेलाविरुद्धको खोप लगाइने पनि स्वास्थ्य कार्यालय प्रमुख घिमिरेले जानकारी दिनुभयो । उहाँका अनुसार नौ महिनादेखि पाँच वर्षसम्मका बालबालिकालाई दादुरा–रुबेला खोप दिइने छ । जिल्लाभरका १० हजार बालबालिकालाई खोप दिने लक्ष्य रहे पनि स्वास्थ्य कार्यालयले सङ्कलन गरेको तथ्याङ्कअनुसार खोप लगाउनुपर्ने लक्षित बालबालिकाको सङ्ख्या आठ हजार १८७ जना रहेको पनि घिमिरेले बताउनुभयो ।
स्वास्थ्य कार्यालयका अनुसार दादुरा–रुबेला खोप लगाउनुपर्ने सबैभन्दा बढी फुङ्लिङ नगरपालिकाका एक हजार ६३१ जना लक्षित बालबालिका रहेका छन् । यस्तै सिरिजंघा गाउँपालिकामा एक हजार ५० जना, आठराई त्रिबेणी गाउँपालिकामा ८६०, मिक्वाखोला गाउँपालिकामा ८५३, फक्ताङ्लुङ गाउँपालिकामा ८१३ जना बालबालिका रहेका छन् ।
मैवाखोला गाउँपालिकामा ७८६ जना, मेरिङ्देन गाउँपालिकामा ७७७, सिदिङ्वा गाउँपालिकामा ७४२ र पाथीभरा याङ्वरक गाउँपालिकामा ६७५ जना लक्षित बालबालिका रहेका छन् । स्वास्थ्य कार्यालयका अनुसार लक्षित बालबालिकालाई दादुरा–रुबेला खोपसँगै यसअघि छुटेका बालबालिकालाई नियमित खोपअन्तर्गत डीपीटी–हेप, बी–हिव, पीसीभी र आइपीभी खोप पनि लगाइने छ ।
यता अभिमुखीकरणमा सहभागी फुङ्लिङ नगरपालिकाका प्रमुख अमिर मादेनले कोही पनि बालबालिकालाई खोप लगाउन नछुटाउन र अभियानलाई प्रभावकारी बनाउन स्वास्थ्य कार्यालयलाई सुझाव दिनुभयो । उहाँले अभियानका लागि स्थानीय तहको तर्फबाट गर्नुपर्ने सहयोगमा कमी नहुने पनि बताउनुभयो ।
यस्तै कार्यबाहक जिल्ला समन्वय समिति प्रमुखको जिम्मेवारी सम्हाली रहनुभएको उपप्रमुख कृष्णप्रसाद लिङ्खिमले पनि दादुरा–रुबेला खोप अभियानलाई प्रभावकारी बनाउनुपर्ने बताउनुभयो । उपप्रमुख लिङ्खिमले लक्षित बालबालिका भएका परिवारलाई खोप अभियानमा अनिवार्य सहभागी हुन आह्वान पनि गर्नुभयो । प्रमुख जिल्ला अधिकारी हीरादेवी पौडेलले अभियानका क्रममा आवश्यक पर्ने सुरक्षा व्यवस्थाका लागि आवश्यक प्रवन्ध मिलाउने प्रतिवद्धता जनाउनुभयो ।