सार्वजनिक शिक्षा सुधारको मूल अवरोधक पत्ता लगाउँदै फक्ताङलुङ,कारण पहिचानपछि सुधारको योजना बन्ने

खगेन्द्र अधिकारी
ताप्लेजुङ,चैत २४ । सार्वजनिक शिक्षा सुधारका समस्याको कारण पत्ता लगाउन ताप्लेजुङको फक्ताङलुङ गाउँपालिकाले ‘मूल कारण सर्वेक्षण तथा विश्लेषण’गरेको छ । ४० वटै बिद्यालयमा पुगी पालिकाले सम्वन्धित बिद्यालयका मूल समस्याहरु पहिचान गरेको छ भने समस्या समाधानका लागि अब अपनाईने रणनीतिका बारेमा सरोकारवालासंग एकीकृत छलफल थालेको छ ।

पालिकाका सूचना अधिकारी जय रिजालका अनुसार फक्ताङलुङ गाउँभरीमा ९ वटा मावि,१४ वटा आधारभूत(कक्षा १–८ चलेका) बिद्यालय र १७ वटा कक्षा १–३ र १–५ चलेका बिद्यालय छन् । हिमालयन् डेभलप्मेट फाउण्डेसन अष्ट्रेलिया(एचडिएफए) को सहयोगमा पालिकाले सम्वन्धित बिद्यालयका समस्याहरुको पहिचान गरेको छ । गाउँ कार्यपालिका सदस्य मिङमाडण्डु शेर्पाका अनुसार बिद्यालयको भौतिक पूर्वाधार,शैक्षिक सामग्रीको समस्या,सिकाई सहजीकरण,अभिभावकीय सचेतना अभिबृद्धि सहितका बिषयलाई आधार मानेर समस्या पहिचान गरिएको छ । पहिचान भएका समस्या समाधानका लागि कसको के भूमिका रहने भन्ने पत्ता लगाई सोहि अनुसार व्यवस्थापन गर्नेगरि पालिकाले अभियान चलाएको शेर्पाले जानकारी दिनुभयो ।

गाउँ शिक्षा समितिका समेत अध्यक्ष रहनु भएका पालिका अध्यक्ष राजन लिम्बू(मुक्ति)ले सार्वजनिक शिक्षा सुधारका उपायहरुको खोजी गर्ने क्रममा पहिला अवरोधक पक्षको पहिचान गरी त्यसलाई क्रमशःसम्बोधन गर्नुपर्ने भएकोले पालिकाले उक्त अभियान सुरु गरेको बताउनुभयो । मूल कारण सर्वेक्षण तथा विश्लेषणको प्रारम्भिक प्रतिबेदन तयार भई उक्त प्रतिबेदन माथि एकीकृत र संगठित छलफल सुरु गरेको र त्यसपछि अन्तिम प्रतिबेदन अनुसार समस्याहरुको सम्बोधनका लागि योजना तथा रणनीतिहरु तय हुने पालिका अध्यक्ष लिम्बूले जानकारी दिनुभयो । गाउँ कार्यपालिका सदस्य शेर्पाले मुल कारण सर्वेक्षणको क्रममा देखिएका समस्याका आधारमा ति समस्याको उचित र प्रभावकारी सम्बोधन कसबाट हुन सक्छ भन्ने निक्र्यौल हुने समेत जानकारी दिनुभयो ।

‘पहिला कुरा गुणस्तरीय र प्रभावकारी शैक्षिक वातावरण निर्माणका आवश्यकता के हुन् भन्ने पहिचान भएको छ’शेर्पाले भन्नुभयो’त्यसपछि अब ति आवश्यकताको सम्बोधनका लागि कसको के भूमिका हुने योजना तथा रणनीति बनाउँछौं’शेर्पाले भन्नुभयो । उहाँले तयार भएको योजना तथा रणनीतिबाट नतिजा प्राप्त गर्न पालिकाको अग्रसरतामा सम्वन्धित पक्षलाई केन्द्रित गर्ने योजना रहेको सुनाउनुभयो ।

शैक्षिक क्रियाकलापमा असर हुने देखेपछि फक्ताङलुङ गाउँपालिकाले पालिका क्षेत्रका बिद्यालयमा कम्तिमा दुई शैक्षिक सत्र कार्यवधि पूरा नगरी अन्तरपालिका वा अन्तर जिल्ला सरुवा जान समेत रोक लगाएको छ । पालिकाको शिक्षा ऐनमा उक्त प्रवन्ध गर्दै पालिकाले दुई शैक्षिक सत्र कार्यवधि पूरा गरेकाहरुले समेत शैक्षिक सत्रको अन्त्य र सुरुमा मात्र अन्तरपालिका वा अन्तर जिल्ला सरुवा जान आबेदन गर्न सकिने नियम बनाएको छ ।

पालिकाको शैक्षिक क्रियाकलापमा असर पर्ने,पढाईमा मार्का पर्ने,बिषयगत शिक्षकको अभाव सृजना हुने सहितका नकारात्मक प्रभाव देखिन थालेपछि पालिका उक्त निर्णयमा पुग्न बाध्य भएको पालिका अध्यक्ष लिम्बूले जानकारी दिनुभयो ।