ताप्लेजुङबाट पहिलोपटक मानव जैविक नमूना संकलन गरी कुरियर सेवामार्फत प्रदेश जनस्वास्थ्य प्रयोगशाला पु-याईयो

खगेन्द्र अधिकारी
ताप्लेजुङ,चैत २३ । जिल्लाहरूमा परीक्षण गर्न असम्भव मानव जैविक नमूना संकलन गरी कुरियर सेवामार्फत कोशी प्रदेश जनस्वास्थ्य प्रयोगशाला पु-याएर परीक्षण गर्न सुरु गरिएको छ ।

ताप्लेजुङबाट पहिलोपटक मानव जैविक नमूना संकलन गरी कुरियर सेवामार्फत कोशी प्रदेश जनस्वास्थ्य प्रयोगशाला पु-याएर परीक्षण सुरु गरिएको प्रदेश जनस्वास्थ्य प्रयोगशालाका निमित्त निर्देशक प्रकाशचन्द्र कार्कीले जानकारी दिनुभयो । ताप्लेजुङ जिल्ला अस्पतालका स्वास्थ्यकर्मीले जिल्लामा परीक्षण गर्न असम्भव मानव जैविक नमूना संकलन गरी प्रदेशको जनस्वास्थ्य प्रयोगशालासम्म प्रेषण गर्ने जिम्मेवारी पाएको नेपाल क्यान मुभलाई जिम्मा लगाएका थिए । प्रभावकारी प्याकेजिङ र ढुवानीपछि परीक्षणका ताप्लेजुङबाट पहिलोपटक मानव जैविक नमूना परीक्षणका लागि कोशी प्रदेश जनस्वास्थ्य प्रयोगशालामा आइपुगेको कार्कीले जानकारी दिनुभयो । संकलित मानव जैविक नमूनाको ढुवानी गरी कोशी प्रदेशको जनस्वास्थ्य प्रयोगशालासम्म प्रेषण गर्ने जिम्मेवारी नेपाल क्यान मुभले पाएको छ । नेपाल क्यान मुभ कुरियर जस्तै सेवा प्रदान गर्ने निकाय हो ।

कोशी प्रदेशका १४ जिल्लाहरुमानै नेपाल क्यान मुभले संकलित मानव जैविक नमूना ढुवानी गरी प्रदेश जनस्वास्थ्य प्रयोगशालासम्म प्रेषण गर्ने जिम्मेवारी पाएको छ । संकलित जैविक नमूनाको ढुवानी खर्च प्रदेश जनस्वास्थ्य प्रयोगशाला आफैंले व्यहोर्ने कार्कीले बताउनुभयो । कार्कीका अनुसार जिल्लामा असम्भव मानव जैविक परीक्षण गर्नुपर्ने अवस्थाका नागरिकले सम्वन्धित जिल्ला अस्पतालमा गएर नमूना दिने र उक्त नमूनालाई स्वास्थ्यकर्मीले उचित प्याकेजिङ गरी नेपाल क्यान मुभलाई जिम्मा लगाएपछि उसले सुरक्षित तवरले कोशी प्रदेश जनस्वास्थ्य प्रयोगशाला सम्म पुर्याउने छ । प्राप्त भएको मानव जैविक नमूनाको परीक्षण गरी सम्वन्धित जिल्ला अस्पतालमा त्यसको रिर्पोट प्रदेश जनस्वास्थ्य प्रयोगशालाले पठाउने भएको छ ।

जिल्ला अस्पताल र स्वास्थ्य कार्यालयमार्फत जिल्लामै परीक्षण गरी नतिजा प्रदान गर्न नसक्ने प्रकृतिका मानव जैविक नमूना संकलन गरी प्रेषण निकायमार्फत जनस्वास्थ्य प्रयोगशालामा पु-याई परीक्षण गरी नतिजा दिने अभियान सम्भवत नेपालमै पहिलोपटक कोशी प्रदेशले सुरु गरेको हो । यसअघि प्रदेश जनस्वास्थ्य प्रयोगशालाले जिल्लाका अस्पतालहरुसंग यस सम्वन्धी सम्झौता गरेको थियो । सम्झौता अनुसार कोशी प्रदेशका सम्बन्धित जिल्लाका अस्पताल तथा स्वास्थ्य कार्यालयहरूले मानव जैविक नमूना संकलन गर्नेछन् । संकलन भएको मानव जैविक नमूना नेपाल क्यान मुभले सुरक्षित,भरपर्दो र विश्वसनीय रूपले प्रदेश जनस्वास्थ्य प्रयोगशालासम्म प्रेषण गर्न सुरु गरेको नेपाल क्यान मुभका ताप्लेजुङ प्रतिनिधि मनिषा निरौलाले जानकारी दिनुभयो ।

जिल्लामा परीक्षण सम्भव नहुने तर त्यसको परीक्षण नतिजा अनिवार्य प्राप्त हुनैपर्ने अवस्थाका बिरामीका लागि यो अभियान अति प्रभावकारी हुने ताप्लेजुङ जिल्ला अस्पतालका मेडिकल सुपरीटेन्डेन्ट एमडीजिपी डाक्टर प्रमाण जैरुले बताउनुभयो । प्रदेश जनस्वास्थ्य प्रयोगशालाले नमूना संकलनमा खटिने चिकित्सक तथा स्वास्थ्यकर्मीलाई संकलन,प्याकेजिङ,भण्डारणका बारेमा तथा प्रेषण निकायलाई यसको व्यवस्थापनका बारेमा अभिमुखीकरण गराउने योजना पनि बनाएको छ । स्वास्थ्य कार्यालय ताप्लेजुङका प्रमुख कुलबहादुर पौडेलले मापदण्ड अनुसारको संकलन, भण्डारण,व्यवस्थापन र प्रेषणमा ध्यान दिने हो भने यो अभियान निकै प्रभावकारी र लाभदायक हुने विश्वास व्यक्त गर्नु भएको छ ।