उत्कृष्ट काम गर्ने वडादेखि जनप्रतिनिधि र कर्मचारीलाई सम्मान गर्दै पाथीभरा याङवरक

खगेन्द्र अधिकारी
ताप्लेजुङ,माघ १९ । ताप्लेजुङको पाथीभरा याङवरक गाउँपालिकाले प्रत्येक आर्थिक बर्षमा स्वीकृत योजना तथा कार्यक्रम समयमै सम्पन्न गर्ने वडादेखि कामप्रति जिम्मेवार र जवाफदेही जनप्रतिनिधि र कर्मचारी सम्मलाई सम्मान गर्ने भएको छ ।

पालिकाले पुरस्कार तथा सम्मान सम्वन्धी मापदण्ड कार्यान्वयनमा ल्याएको हो । पालिका अध्यक्ष केशरकुमार सुब्बाका अनुसार कर्मचारीतर्फ मासिक कार्य सम्पादनको उत्कृष्टताका आधारमा ‘महिनाको महिनाको उत्कृष्ट कर्मचारी’पुरस्कार दिइने छ भने बार्षिक रुपमा उत्कृष्ट तथा सर्बोत्कृष्ट कर्मचारीहरुलाई पुरस्कृत गरिने छ । कर्मचारीका सम्मानका लागि १० वटा सूचक तयार पारिएको छ । कार्यालय समयका अतिरिक्त कार्यालयलाई पु¥याएको योगदान,जनप्रतिनिधिसंगको समन्वय र आपसी सञ्चार,काममा दक्षता र व्यवसायिकता,सामूहिक कार्यमा संलग्नता र सृजनशील र असल अभ्यास मूल्याङ्कनका प्रमुख सूचक रहने छन् । यस्तै सेवाग्राहीप्रतिको व्यवहार,कार्य सम्पादन पछि प्राप्त उपलब्धी,नेतृत्व क्षमता र समय पालना,अनुशासन एवम् नियमित रुपमा पहिरने कार्यालय पोशाकलाई समेत मूल्याङ्नका आधारमा रुपमा लिइने गाउँपालिकाले जनाएको छ ।

पालिकाले स्थापना दिवसको अवसरमा एकजना सर्बोत्कृष्ट र तीनजना उत्कृष्ट कर्मचारीलाई पुरस्कृत गर्ने छ । पुरस्कार रकम भने कार्यपालिकाले बैठकले निर्धारण गरे अनुसार हुने कार्यविधिमा उल्लेख गरिएको छ । पुरस्कृत हुने कर्मचारी छनौट गर्नुपूर्व पुरस्कृत हुन योग्य कम्तिमा १० जना कर्मचारीको प्राथमिक नामावली तयार हुने छ । सम्वन्धित वडा र स्वास्थ्य चौकीको हकमा वडाध्यक्षले पालिकाको हकमा प्रमुख प्रशासकीय अधिकृतले पुरस्कृत हुन योग्य कम्तिमा १० जना कर्मचारीको नामावली कार्यपालिका बैठकमा प्रस्तुत गर्नुपर्ने व्यवस्था गरिएको छ । प्राप्त सिफारिसका आधारमा कार्यविधिमा उल्लेख गरिएका १० वटा सूचकलाई आधार मानी पुरस्कृत हुने कर्मचारीको नाम कार्यपालिका बैठकले स्वीकृत गर्ने छ । २०७३ साल फागुन २७ गते स्थानीय तह घोषणा भएका हुन् ।