ढुंगेसाँघु र फाकुम्बामा माओवादीको वडा कमिटी गठन
-उज्यालो पोष्ट
ताप्लेजुङ, पुस १८ । ताप्लेजुङको मैवाखोला गाउँपालिकाको ढुंगेसाँघु र फाकुम्बामा नेकपा (माओवादी केन्द्र) को वडा कमिटी गठन भएको छ । मैवाखोला गाउँपालिका–१ ढुंगेसाँघु र वडा ५ फाकुम्बामा माओवादी केन्द्रको वडा कमिटी गठन भएको हो ।
माओवादी केन्द्र वडा नम्बर १ ढुंगेसाँघुको बिहीबार सम्पन्न दोस्रो सम्मेलनले दिनेश वनेम अध्यक्ष रहेको वडा कमिटी चयन गरेको हो । वडा कमिटीको उपाध्यक्षमा प्रेमराज लिबाङ, सचिवमा अभिषेक वनेम, सहसचिवमा लीलादेवी खतिवडा र कोषाध्यक्षमा मनमाया लिम्बू चयन हुनुभएको छ ।
वडा नम्बर ५ फाकुम्बामा बुधबार सम्पन्न दोस्रो वडा सम्मेलनबाट पूर्णध्वज वनेम (लामा) को अध्यक्षतामा कमिटी गठन भएको छ । वडा कमिटीको उपाध्यक्षमा नरेन्द्रकुमार वनेम, सचिवमा साङगे शेर्पा, सहसचिव पर्वत वनेम र कोषाध्यक्षमा ल्हामु शेर्पा चयन हुनुभएको छ ।
दुवै वडाको सम्मेलन माओवादी केन्द्रका वैकल्पिक केन्द्रीय सदस्य तथा मैवाखोला गाउँपालिका अध्यक्ष विजयप्रकाश वनेम, प्रदेश कमिटी सदस्यद्वय पर्शुराम थोप्रा र सन्तोष दर्नाल, मैवाखोला गाउँपालिका कमिटीका सचिव चन्द्रकुमार तामाङ लगायतका पार्टी नेतृत्वको उपस्थितिमा सम्पन्न भएको बताइएको छ । अहिले माओवादी केन्द्रले जिल्लाका सबै स्थानीय तह (पालिका) का वडाहरुमा सम्मेलन साथै पार्टी बैठकहरु सञ्चालन गर्दै आएको जनाएको छ ।
