सार्वजनिक शिक्षा सुधारका लागि मैवाखोलाद्धारा अभिभावक जागरण अभियान सुरु

खगेन्द्र अधिकारी
ताप्लेजुङ,पुस ६ । सार्वजनिक शिक्षा सुधार केन्द्रित अभियान चलाउँदै आएको ताप्लेजुङको मैवाखोला गाउँपालिकाले अभिभावक जागरण अभियान सुरु गरेको छ ।

मैवाखोला गाउँपालिकाले अघिल्लो बर्ष आयोजना गरेको सार्वजनिक सुनुवाई कार्यक्रममा समेत अभिभावक शिक्षाको आवश्यकता रहेको औंल्याईको थियो । गाउँपालिका अध्यक्ष विजयप्रकाश वनेमका अनुसार गाउँपालिकाका ६ वटै वडाका अभिभावकहरुमाझ जागरण अभियान चलाइने छ ।

अभिभावक जागरण अभियानमा सम्वन्धित क्षेत्रको शैक्षिक अवस्थाको विश्लेषण गर्दै शैक्षिक सुधारका लागि अभिभावकहरुको भूमिका समेत प्रष्ट्याइने छ । पालिकाको केन्द्र रहेको वडा नं ३ साँघुस्थित नारायणी माविबाट अभिभावक जागरण अभियान सुरु भएको हो ।

अभिभावक जागरण अभियानमा राष्ट्रिय शिक्षा अभियान नेपालका संयोजक अभिषेक घिमिरेले विज्ञको रुपमा सहजीकरण गर्नुहुने छ । गत जेठ दोस्रो साता मैवाखोला गाउँपालिकाले आयोजना गरेको दुईदिने वृहत्त शैक्षिक सम्मेलनका क्रममा समेत घिमिरे विज्ञ तथा मुख्य सहजकर्ता हुनुहुन्थ्यो ।

गाउँपालिका अध्यक्ष वनेमले सुरु भएको अभिभावक जागरण अभियानमा सक्रियतापूर्वक सहभागिता जनाई सार्वजनिक शिक्षा सुधारको अभियानमा साथ दिन आग्रह समेत गर्नु भएको छ । अध्यक्ष वनेमले स्थानीय सरकार,शिक्षक,बिद्यार्थी,नागरिक अगुवा र बिद्यालय व्यवस्थापन समितिसहितको संयुक्त प्रयासबाट मात्र सार्वजनिक शिक्षा सुधारमा योगदान पुग्ने बताउनु भएको छ ।