बृद्ध महिलालाई हतियार देखाई लुटपाट गरेको अभियोगमा ताप्लेजुङमा ४ जना पक्राउ

उज्यालो पोष्ट
ताप्लेजुङ,मंसिर २१ । बृद्ध महिलालाई हतियार देखाई लुटपाट गरेको अभियोगमा ताप्लेजुङ प्रहरीले ४ जनालाई पक्राउ गरेको छ ।

जिल्ला प्रहरी कार्यालय ताप्लेजुङका प्रवक्ता तथा सूचना अधिकारी प्रहरी निरीक्षक विवेक बस्तनेतका अनुसार पक्राउ पर्नेमा फुङलिङ नगरपालिका वडा नं ६ का ४५ बर्षिय टीकाराम गुरुङ र २२ बर्षिय आशिष गुरुङ रहेका छन् । यस्तै फुङलिङ नगरपालिका वडा नं ४ का २० बर्षिय सुजल लिम्बू र २६ बर्षिय सरोज शेर्पा रहेका छन् ।

पक्राउ परेका ४ जना माथि यही मंसिर १३ गते आफ्नै घरमा सुतिरहेका फुङलिङ नगरपालिका वडा नं ६ निवासी बेदमाया गुरुङ र रिना गुरुङलाई मास्क लगाएर घरेलु हतियार देखाई दुई जोर सुनको रिङ र नगद ५१ हजार ७ सय रुपैयाँ लुटी लगेको अभियोग रहेको छ ।

पक्राउ परेका ४ जनाबाट प्रहरीले नगद ८ हजार र वारदातमा प्रयोग गरेको बामफोक समेत वरामद गरेको प्रहरी निरीक्षक बस्नेतले जानकारी दिनुभयो । पक्राउ परेका ४ जनालाई मुलुकी फौजदारी कार्यविधि संहिता २०७४ को दफा १४(३) बमोजिम ताप्लेजुङ जिल्ला अदालतबाट ७ दिनको म्याद लिई थप अनुसनधान कार्य जारी राखिएको समेत प्रहरीले जानकारी दिएको छ ।