दोस्रो कञ्चनजंघा(सेसेलुङ)अन्तराष्ट्रिय आमन्त्रण गोल्डकपको खेल तालिका सार्वजनिक

खगेन्द्र अधिकारी
ताप्लेजुङ,मंसिर ८ । मंसिर १५ गते देखि २२ गते सम्म ताप्लेजुङको फुङलिङमा हुने दोस्रो कञ्चनजंघा(सेसेलुङ)अन्तराष्ट्रिय आमन्त्रण गोल्डकपको खेल तालिका सार्वजनिक भएको छ ।

चासोक तङ्नामको अवसर पारेर हुने कञ्चनजंघा(सेसेलुङ)गोल्डकपको उद्घाटन खेलमा १५ गते आयोजककोतर्फबाट कञ्चनजंघा फुङलिङ क्लवले तेह्रथुमको सन्दु फुटबल क्लवसंग प्रतिश्पर्धा गर्ने छ । १६ गते डाँगीहाट फुटबल क्लव मोरङले इलामको रेड डेभिल्स फुटबल क्लवसंग प्रतिश्पर्धा गर्ने छ । १७ गते गोधुली फुटबल क्लव धरान सुनसरीको भिडन्त भारत सिलगुढीको कञ्चनजंघा फुटबल क्लवसंग हुने आयोजक चासोक तङनाम सञ्चालन समितिका अध्यक्ष चन्द्रकुमार थेबेले जानकारी दिनुभयो । उहाँका अनुसार पहिलो चरणको अन्तिम खेलमा न्यू स्टार क्लव बिर्तामोड झापाले मंसिर १८ गते पाँचथरको फिदिम स्पोर्टिङ क्लवसंग प्रतिश्पर्धा गर्ने छ ।

चासोक तङनाम सञ्चालन समितिका कोषाध्यक्ष कुलदिप मादेनका अनुसार प्रतियोगिताका बिजेताले तीन लाख दुईहजार ८१ रुपैयाँ तथा उपबिजेताले एकलाख ५१ हजार ८१ रुपैयाँ प्राप्त गर्नेछन् । चासोक तङ्नाम पर्वको अवसरमा फुटबल प्रतियोगिताका साथ बिभिन्न सांस्कृतिक कार्यक्रम समेत हुने भएका छन् । फुटबल तथा चासोक तङ्नाम कार्यक्रम सम्पन्न गर्न करिव ५४ लाख रुपैयाँ खर्च हुने आयोजकको अनुमान रहेको छ । साँस्कृतिक कार्यक्रमतर्फ शान्तिश्री परियार,झुमा लिम्बू लगायतका कलाकारको उपस्थितिमा साँगीतिक साँझ हुने समेत आयोजकले जानकारी दिएको छ ।

यसैबिच दोस्रो कञ्चनजंघा(सेसेलुङ)अन्र्तरिाष्ट्रिय आमन्त्रण गोल्डकप प्रतियोगितामा आयोजककोतर्फबाट प्रतिश्पर्धा गर्न लागेको कञ्चनजंघा फुङलिङ क्लवले आफ्नोतर्फबाट खेलमा सहभागी हुने खेलाडीको नामावली समेत सार्वजनिक गरेको छ । क्लवका व्यवस्थापक प्रविन राईका अनुसार अनुप सेन्दाङले टिमको कप्तानी सम्हाल्नु हुने छ । टिममा सुहाङ लिम्बू(गोलरक्षक),मञ्जित एङदेन,जंगबहादुर गुरुङ,पवन लिम्बू,विवेक मादेन र पासाङ शेर्पा फरवार्डको रुपमा देखा पर्नुहुने छ ।

प्रनिस गुरुङ,आशिष लिम्बू,सुनुयोजित लिम्बू,अर्जुन लिम्बू,सन्तोष गहतराज,ऋतिक चङवाङ र प्रेम लिम्बू डिफेण्डरको रुपमा रहनु हुने छ । सबिन तामाङ,शिशिर राई,एलिन लिम्बू मिडफिल्डरमा रहनु हुने छ । टिममा जिल्ला भित्रका खेलाडी मात्र समावेश गरिएको कञ्चनजंघा फुङलिङ क्लवले जनाएको छ । सुहाङ लिम्बू,सन्तोष गहतराज,प्रनिस गुरुङ,एलिन लिम्बू र ऋतिक चोङवाङले ताप्लेजुङको सिनियर टिमबाट डेब्यु गर्दै हुनुहुन्छ । क्लवको प्रमुख प्रशिक्षकमा सन्तोष गुरुङ र गोल रक्षक प्रशिक्षकमा रविन श्रेष्ठ रहने क्लवले जनाएको छ ।