पाठेघरको मुखको क्यान्सर बिरुद्ध ताप्लेजुङमा माघ दोस्रो साताबाट खोप सञ्चालन हुने,६ हजार बढीलाई खोप दिईदैं

खगेन्द्र अधिकारी
ताप्लेजुङ,मंसिर ५ । स्वास्थ्य कार्यालय ताप्लेजुङले यहाँका ६ हजार बढी बालिकाहरुलाई माघको दोस्रो साताबाट पाठेघरको मुखको क्यान्सर(एचपीभी) बिरुद्धको खोप दिने भएको छ ।

स्वास्थ्य कार्यालय ताप्लेजुङका सूचना अधिकारी तथा ल्याव टेक्निसियन निरीक्षक उदयनारायण दुलालका अनुसार एचपीभी बिरुद्धको खोप दिनुपर्ने बालबालिकाहरुको तथ्याङक संकलन गरी खोप प्राप्त गर्ने लक्षित संख्या यकिन गरिएको हो । उहाँका अनुसार जिल्ला भरका ६ हजार २ सय ४८ जना बालिकाहरुलाई यस्तो खोप दिइने छ । सामुदायिक र संस्थागत बिद्यालयहरुमा कक्षा ६ देखि १० सम्म अध्ययन गर्ने तथा बिद्यालय बाहिर रहेका १० देखि १५ बर्ष उमेर समूहका बालिकाहरुलाई यस्तो खोप दिइने छ । कक्षा ६ देखि १० सम्म अध्यापन गराउने ताप्लेजुङका १ सय ६ वटा बिद्यालय र बिद्यालयको पहुँच भन्दा बाहिर रहेका १० देखि १५ बर्ष उमेर समूहका बालिकाहरुको तथ्याङक संकलन गरिएको स्वास्थ्य कार्यालयले जनाएको छ ।

दुलालका अनुसार एचपीभी खोप पाउनेमा लक्षित संख्यामा सबैभन्दा बढी फुङलिङ नगरपालिकामा रहेका छन् । फुङलिङ नगरपालिकामा २ हजार ४ सय ८३ जनालाई खोप लगाउनुपर्ने हुन्छ । यस्तै आठराई त्रिबेणी गाउँपालिकाका ५ सय ३४ जना,फक्ताङलुङ गाउँपालिकामा ५ सय ८८ जना,मिक्वाखोला गाउँपालिकाका ३ सय ५० जनालाई एचपीभी खोप दिइने छ । यस्तै मेरिङदेन गाउँपालिकाका ५ सय ३३ जना,मैवाखोला गाउँपालिकाका ४ सय २७ जना,पाथीभरा याङवरक गाउँपालिकाका ४ सय ४९ जना,सिदिङ्वा गाउँपालिकाका ४ सय ६६ जना र सिरिजङ्गा गाउँपालिकाका ४ सय १८ जनालाई यस्तो खोप दिइने छ ।

स्वास्थ्य कार्यालय ताप्लेजुङका कोल्डचेन अधिकृत (अधिकृत छैटौं)दिनेश रायका अनुसार आउँदो माघ ११ गते देखि माघ मसान्त सम्म खोप सञ्चालन हुने गरी प्रस्ताव तयार भएको छ । खोप समन्वय समितिको बैठक बसेर खोप सञ्चालन हुने मिति तय गर्ने रायले जानकारी दिनुभयो । नेपालमा पाठेघरको क्यान्सर महिलाहरूमा हुने क्यान्सरमध्ये शीर्ष स्थानमा रहेको छ । महिला र पुरुष दुवैको गणना गर्दा पनि फोक्सोको क्यान्सरपछि पाठेघरको क्यान्सर दोस्रो स्थानमा छ ।

पाठेघरको क्यान्सर प्रायः ह्यूमन प्यापिलोमाभाइरसका कारण हुने बताइन्छ । महिलालाई हुने पाठेघरको मुखको क्यान्सरबाट जोगाउने उद्देश्यले किशोरीहरूलाई एचपीभी नामक भाइरसविरुद्ध उक्त खोप दिन लागिएको स्वास्थ्य कार्यालयले जनाएको छ । एचपीभी खोपले पाठेघरको मुखको क्यान्सरलाई ९०% सम्म घटाइदिन प्रभावकारी हुने अध्ययनहरुले देखाएका छन् ।

एचपीभी भाइरससँग संसर्गमा आउनुभन्दा अगावै किशोरीलाई यो खोप दिँदा सबभन्दा प्रभावकारी हुने मानिएको छ । खोपले सङ्क्रमण हुनबाट मात्र जोगाउने तर उक्त भाइरस कसैको शरीरमा पहिलेदेखि नै छ भने यसले त्यसलाई शरीरबाट हटाइदिन भने नसक्ने भएकोले किशोरी उमेरमै खोप दिए यसले संक्रमण हुनबाट रोक्ने स्वास्थ्यकर्मीहरु बताउँछन् ।