सिकैचा उपनिर्वाचन : अंकगणितको कसीमा दलहरु,यस्तो थियो २०७९ को निर्वाचन अवस्था

खगेन्द्र अधिकारी
ताप्लेजुङ,मंसिर ३ । ताप्लेजुङको सिरिजङ्गा गाउँपालिका वडा नं ३ को वडाध्यक्ष उपनिर्वाचनका लागि ५ राजनीतिक दलले उम्मेदवारी दर्ता गरेसंगै दलहरुले मतदाताको अंकगणित समेत सुरु गरेका छन् ।

जिल्ला निर्वाचन कार्यालय ताप्लेजुङका निमित्त जिल्ला निर्वाचन अधिकारी बान्दवराज(बिपिन)दुलाका अनुसार सिकैचामा अहिले एक हजार पाँच सय २८ मतदाता छन् । दुई मतदानस्थल रहेको सिकैचाको कुञ्जारी मतदान स्थलमा एकहजार २६ मतदाता छन् । ओसे मतदानस्थलमा पाँचसय दुई मतदाता रहेका छन् । सिकैचाको उपनिर्वाचनमा आठ सय ४४ पुरुष र छ सय ८४ महिला मतदाता छन् । २०७९ सालमा कुञ्जारी मतदान स्थलमा नौ सय ९४ तथा ओसे मतदान स्थलमा पाँच सय २९ गरी कूल एकहजार पाँच सय २३ मतदाता थिए । अहिलेको उपनिर्वाचनका क्रममा पाँचजना मतदाता मात्र थपिएको देखिएको छ ।

मतदाता तुलनामा गर्दा २०७९ सालभन्दा अहिलेको उपनिर्वाचनका लागि कुञ्जारी मतदान स्थलमा ३२ जना मतदाता बढेका छन् भने ओसे मतदान स्थलमा २७ जना मतदाता घटेका छन् । २०७९ सालको निर्वाचनमा काँग्रेस,माओवादी केन्द्र र नेकपा एस सहितको गठबन्धन थियो । एमाले र संघीय लोकतान्त्रिक राष्ट्रिय मञ्च एक्ला एक्लै लडेका थिए । अहिले नेकपा एसले उम्मेदवारी दिएन भने २०७९ सालमा उम्मेदवारी नदिएको राष्ट्रिय स्वतन्त्र पार्टी चुनावी मैदानमा छ । उ बेला गठबन्धनमा लडेका काँग्रेस र माओवादी केन्द्रले आ–आफ्नै उम्मेदवार खडा गरेका छन् । संघीय लोकतान्त्रिक राष्ट्रिय मञ्चले समेत उम्मेदवारी दिएको छ । सबैको उम्मेदवारी कायम रहे त्यहाँ काँग्रेस,एमाले,माओवादी केन्द्र,राश्वपा र राष्ट्रिय मञ्चबिच प्रतिश्पर्धा हुने छ ।

माओवादी केन्द्र र नेकपा एस सहितको गठबन्धन रहेको बेला २०७९ सालको उपनिर्वाचनमा काँग्रेस उम्मेदवार दिलप्रसाद बोखिम एमाले उम्मेदवार कुमारी साउदेनलाई चार मतान्तरले पराजित गरी वडाध्यक्षमा निर्वाचित हुनु भएको थियो । उ बेला काँग्रेस उम्मेदवार बोखिमले चार सय तीन तथा एमाले उम्मेदवार कुमारी साउदेनले तीनसय ९९ मत ल्याउनु भएको थियो । काँग्रेसले बोखिमको ठाउँमा भीमकुमार लक्सम्बालाई उम्मेदवार बनाएको छ ।

एमालेले यसअघि बाखिमसंग चार मतान्तरले पराजित साउदेनलाई नै दोहोर्याएर उम्मेदवार बनाएको छ । माओवादी केन्द्रले वडा सदस्यबाट राजिनामा गराएर अम्बि साउदेनलाई उम्मेदवार बनाएको छ । साउदेन २०७९ सालको निर्वाचनमा तीनसय ६५ मत ल्याएर वडा सदस्यमा बिजयी हुनु भएको थियो । अम्बिको घर र कुमारीको माइती ओसे हो । कुमारीको घर चाँही कुञ्जारी हो । चेली माइती रहनु भएका उहाँहरु प्रतिश्पर्धी बन्नु भएको छ ।

राश्वपा उम्मेदवार देवीप्रसाद पौडेलको घर पनि यही भएकोले यसपटक ओसेका मतदाता सबैको तानातानमा पर्ने देखिएको छ । काँग्रेस उम्मेदवार लक्सम्बा कुञ्जारीका र संघीय लोकतान्त्रिक राष्ट्रिय मञ्चका राजेन्द्र काङ्वा लिम्बू वरक्पाका हुनुहुन्छ । गठबन्धन सहितको चुनावी भीडन्त रहेको २०७९ सालको निर्वाचनमा वडाध्यक्ष काँग्रेसले जित्दा एक सदस्य एमालेले र बाँकी तीन सदस्य माओवादी केन्द्रले जितेको थियो । संघीय लोकतान्त्रिक राष्ट्रिय मञ्चबाट वडाध्यक्षका उम्मेदवार हस्तबहादुर काङवाले ३९ मत ल्याउनु भएको थियो ।

एमालेका चन्द्रवीर मादेनले तीनसय ६६ मत ल्याएर वडा सदस्यमा निर्वाचित हुनु भएको थियो । यस्तै माओवादी केन्द्रका सीता भट्टराईले चारसय मत र भक्तिमाया कालिकोटेले तीनसय ९४ मत ल्याउँदा उहाँहरुका प्रतिश्पर्धी एमालेका क्रमशःमञ्जु इदिङगो लिम्बूले तीनसय ७९ र हर्कमाया विकले तीनसय ७८ मत ल्याउनु भएको थियो । सो निर्वाचनमा माआवादी केन्द्रका बलबहादुर मादेनले दुई सय ८७,नेकपा एसका गणेशकुमार यवागु लिम्बूले एकसय १९,लोकतान्त्रिक राष्ट्रिय मञ्चका राजेन्द्र काङ्वा लिम्बूले एकसय आठ,तारा बोखिमले ५२ मत र मेनुका लिम्बूले ४५ मत ल्याउनु भएको थियो ।

आफ्ना पार्टीका वडाध्यक्षका उम्मेदवार हस्तले ३९ मत ल्याउँदा सदस्यमा झण्डै तीनगुणा बढी मत ल्याउनु भएका राजेन्द्र अहिले संघीय लोकतान्त्रिक राष्ट्रिय मञ्चबाट वडाध्यक्षका उम्मेदवार हुनुहुन्छ । त्यही भएर यो निर्वाचनमा निकै कडा प्रतिश्पर्धा हुने अनुमान गरिएको छ ।