पोलबाट झरेको तारको करेन्ट लागेर ताप्लेजुङको मैवाखोलामा ७ बर्षिय बालिका घाइते,अवस्था गम्भिर

उज्यालो पोष्ट
ताप्लेजुङ,मंसिर २ । बिद्युत प्रवाह भइरहेको तार पोलबाट खसेर लाग्दा ताप्लेजुङको मैवाखोला गाउँपालिका वडा नं ३ मा ७ बर्षिय एक बालिका करेन्ट लागेर गम्भिर घाइते हुनु भएको छ ।

उहाँको अवस्था ज्यादै नाजुक रहेको मैवाखोला गाउँपालिका अध्यक्ष विजयप्रकाश वनेमले जानकारी दिनुभयो । घाइते हुनेमा मैवाखोला गाउँपालिका वडा नं ३ का साङ्गे शेर्पाकी ७ बर्षिया छोरी मंसिरी शेर्पा रहनु भएको छ । सरस्वती आधारभूत बिद्यालय तुम्बेमा अध्ययनरत उहाँ घर फर्कदै गरेका बेला पोलबाट झरेको बिद्युतीय तारले लागेको थियो ।

जिल्ला प्रहरी कार्यालय ताप्लेजुङका प्रहरी प्रमुख(डिएसपी)रवि रावलले घटनास्थलतर्फ प्रहरी निरीक्षकको नेतृत्वमा प्रहरी टोली परिचिालित भएको जानकारी दिनुभयो । मैवाखोला गाउँपालिकाको वडा नं ५ स्थित पार्टीडाँडा माविका शिक्षक शान्ता आङवुहाङका अनुसार सो क्षेत्रमा दुईबर्ष अघि मात्र यस्तै प्रकृतिको करेन्ट लागेर एकजनाले ज्यान गुमाएका थिए ।