पाँचथरको थर्पुमा सम्पन्न आँखा शिविरबाट ५ सय बढीले पाए सेवा,४६ जनाको आँखाको शल्यकृया

खगेन्द्र अधिकारी
ताप्लेजुङ,मंसिर १ । पाँचथरको याङवरक गाउँपालिकास्थित थर्पु बजारमा सञ्चालित शल्यकृया सहितको दुईदिने निःशुल्क आँखा शिविरमा ५ सय ९ जनाले आँखाको परीक्षण तथा उपचार गराएका छन् ।

याङवरक गाउँपालिका,नेपाल नेत्रज्योति संघ ताप्लेजुङ र सेवा फाउण्डेसन काठमाडौंको संयुक्त आयोजना तथा मेची आँखा अस्पताल बिर्तामोडको प्राविधिक सहयोगमा भएको शिविरमार्फत ४६ जनाको आँखाको शल्यकृया गरिएको छ । नेपाल नेत्रज्योति संघ ताप्लेजुङद्धारा सञ्चालित डिचेन डोङ्गला स्मारक आँखा उपचार केन्द्रका फिल्ड आइर्वकर काजीमान थेबेका अनुसार शल्यकृया गरिएकामध्ये ४० जना मोतियाबिन्दुका बिरामी रहेका छन् । ६ जनाको आँखाको साधारण शल्यकृया गरिएको थेबेले जानकारी दिनुभयो । शिविरमार्फत ३ सय १७ जनालाई पढ्न मिल्ने प्रकृतिको निःशुल्क चश्मा बितरण गरिएको छ भने ३ सय ७३ जनालाई औषधि बितरण गरिएको छ । नेपाल नेत्रज्योति संघ ताप्लेजुङले याङवरक गाउँपालिका पाँचथरसंगको सहकार्यमा थर्पु बजारमा याङवरक आँखा उपचार केन्द्र सञ्चालनमा ल्याएको छ ।

यसैबिच ताप्लेजुङ जिल्लाका मेरिङदेन,आठराई त्रिबेणी,मैवाखोला र मिक्वाखोला गाउँपालिकाका सेवाग्राहीलाई लक्षित गरी मंसिर २० र २१ गते दोभान बजारमा दुईदिने निःशुल्क शल्यकृया सेवा सहितको आँखा शिविर सञ्चालन हुने भएको छ । मेरिङदेन गाउँपालिका मुख्य आयोजक तथा नेपाल नेत्रज्योति संघ ताप्लेजुङ र सेवा फाउण्डेसन काठमाडौं आयोजक हुने गरी शिविर सञ्चालन हुन लागेको मेरिङदेन गाउँपालिका अध्यक्ष युकहाङवीर(डम्बर)हाङगामले जानकारी दिनुभयो । नेपाल रेडक्रस सोसाईटी दोभान उपशाखा तथा ताप्लेजुङ उद्योग वाणिज्य संघ शाखा दोभान शिविरको सहयोगी निकायको रुपमा रहने भएका छन् । शिविर सम्पन्न गर्न ताप्लेजुङ उद्योग वाणिज्य संघ शाखा दोभानका अध्यक्ष हरि काफ्ले संयोजक रहेको समिति गठन गरिएको छ ।

दोभानको आँखा शिविर अघि धनकुटा आँखा अस्पतालको प्राविधिक टोलीले पाँचथरको कुम्मायक गाउँपालिकास्थित यासोक बजारमा शल्यकृया सहितको दुईदिने आँखा शिविर सम्पन्न गर्ने छ । कात्तिक २६–२८ सम्म फुङलिङमा भएको तीनदिने निःशुल्क शल्यकृया सहितको आँखा शिविरमा ६ सय ७७ जनाको आँखाको परीक्षण तथा उपचार गरिएको थियो । ६२ जनाको मोतियाबिन्दुको तथा १४ जनाको साधारण गरी कूल ७६ जनाको आँखाको शल्यकृया सम्पन्न गरिएको नेपाल नेत्रज्योति संघ ताप्लेजुङले जनाएको छ ।