पाथीभरा मन्दिरबाट करिव एक हजार किलो फोहोर संकलन गरी व्यवस्थित बिर्सजन गरियो

उज्यालो पोष्ट 
ताप्लेजुङ,मंसिर १ । ताप्लेजुङस्थित पाथीभरा मन्दिरमा शनिवार आयोजित बृहत्त सरसफाई अभियानमार्फत करिव एक क्विन्टल फोहोर संकलन गरिएको छ ।

पाथीभरा क्षेत्र विकास समितिको संयोजन तथा नेपाली सेना,नेपाल प्रहरी,सशस्त्र प्रहरी र पाथीभरा क्षेत्रका स्थानीय बासिन्दाको सक्रियतामा फोहोर संकलन गरी व्यवस्थित बिर्सजन  गरिएको पाथीभरा क्षेत्र विकास समितिले जनाएको छ ।

समितिका कार्यकारी निर्देशक प्रजिन हाङवाङका अनुसार सरसफाई अभियानमा करिव १ सय ३० जना सहभागी हुनुहुन्थ्यो ।

सबैभन्दा बढी सिसा,फलाम तथा टिनजन्य फोहोर सामग्री संकलन भएको पाथीभरा क्षेत्र विकास समितिका सूचना प्रविधि संयोजक सन्तोष पुर्कुटीले जानकारी दिनुभयो ।

प्रमुख जिल्ला अधिकारी नेत्रप्रसाद शर्मा पौडेल,सशस्त्र प्रहरी वल नं नेपाल नं १ गुल्म हेडक्वाटर कञ्चनजंघाका गुल्मपति सशस्त्र प्रहरी नायव उपरीक्षक नरेश मर्हजन,जिल्ला प्रहरी कार्यालय ताप्लेजुङका प्रहरी निरीक्षक विवेक बस्नेत सहितको सुरक्षा निकायको टोली समेत सरसफाई कार्यक्रममा सहभागी भएको पाथीभरा क्षेत्र विकास समितिले जनाएको छ ।