सिकैचाको वडाध्यक्षका लागि मंसिर १६ गते उपनिर्वाचन हुने
उज्यालो पोष्ट
ताप्लेजुङ,कात्तिक १२ । ताप्लेजुङको सिरिजङगा गाउँपालिका वडा नं ३ सिकैचाको वडाध्यक्षका लागि आउँदो मंसिर १६ गते नै उपनिर्वाचन हुने भएको छ ।
निर्वाचन आयोगले उपनिर्वाचन हुन लागेका अन्य स्थानको झैं सिकैचाको वडाध्यक्षका लागि समेत उपनिर्वाचन हुने निर्णय गरी प्रकृया अघि बढाउन जिल्ला निर्वाचन कार्यालय ताप्लेजुङलाई परिपत्र गरेको निमित्त जिल्ला निर्वाचन अधिकारी वान्दवराज दुलालले जानकारी दिनुभयो । उहाँका अनुसार उपनिर्वाचन हुन लागेका अन्य स्थानको झैं अब सिकैचाका लागि पनि जिल्ला निर्वाचन कार्यालयले उपनिर्वाचनका लागि कार्यक्रम अघि बढाउने छ ।
उप निर्वाचनका लागि कात्तिक २६ गते निर्वाचन अधिकृत नियुक्त गरिने छ भने ३० गते निर्वाचन अधिकृतको कार्यालय स्थापना हुने भएको छ । बैदेशिक रोजगारीमा जानु भएका सिकैचाका वडाध्यक्ष दिलप्रसाद बोखिमले हङकङबाटै राजिनामा पत्र पठाएपछि सिकैचामा पनि उप निर्वाचन हुने भएको हो । निर्वाचन आयोगले सिकैचाको वडाध्यक्षका लागि समेत अन्य स्थानको झैं उपनिर्वाचन गर्नेगरी कात्तिक ११ गते निर्णय गरेको हो ।
