पाथीभरामा केवलकार बन्न नहुने भन्दै चित्रकला सहित फुङलिङमा प्रदर्शन
उज्यालो पोष्ट
ताप्लेजुङ,भदौ २६ । मुक्कुम्लुङ(पाथीभरा)केवलकार खारेजी संघर्ष समितिको अगुवाईमा बुधवार ताप्लेजुङ सदरमुकाम फुङलिङमा मुन्धुमी आदिवासी कला प्रदर्शन भएको छ । पाथीभरामा केवलकार बन्न नहुने पक्षमा चित्रकला सहित प्रर्दशन गरिएको हो ।
किराँत याक्थुङ चुम्लुङको अगुवाईमा आउनु भएका कलाकर्मीहरु सुवास तामाङ,सपना नेपाली,मनरा प्रजापति,दिक्षा राई,सोनाम चाम्लिङ,पुनम लिम्बू तथा अनुसन्धान तथा नागरिक अभियान्ता गोविन्द छन्त्याल,निरन्ती तुम्बापो,कैलाई राई सहितका
कलाकर्मीहरुले पाथीभरा क्षेत्रमै गएर तयार पारेका चित्र सहित प्रर्दशन गरिएको थियो । प्रर्दशनका क्रममा ‘केवलकार चाँहिदैन,मुन्धुमी स्थल अतिक्रमण गर्न पाँइदैन,गो ब्याक केवलकार सहितका नारा लागेका थिए । प्रर्दशनका क्रममा पहिचान पक्षधरहरु नेताहरुको समेत सहभागिता रहेको छ ।
कलाकर्मीहरुले पाथीभरामा केवलकार बनाउन नहुने,प्रकृतिको बिनास गर्न नहुने,रुख कटान गर्न नहुने सहितका चित्र कुँदेका छन् । तीनअघि मात्र फुङलिङमा केवलकार निर्माण प्रकृया तत्काल अघि बढाउनुपर्ने र त्यसमा युवाको साथ रहेको भन्दै युवाहरुले मोटरसाइलक र्याली प्रर्दशन गरेका थिए ।
