ताप्लेजुङमा बालबालिका भएको परिवार संख्यानै धेरै,झण्डै ५ हजार घर परिवारका कुनै न कुनै सदस्य भने बिदेशमा

खगेन्द्र अधिकारी
ताप्लेजुङ,साउन २७ । ताप्लेजुङमा बालबालिका भएको परिवार संख्या नै धेरै देखिएको छ ।

राष्ट्रिय जनगणना २०७८ को पछिल्लो अद्यावधिक विवरण अनुसार ताप्लेजुङमा कूल २७ हजार ७ सय ७६ घरपरिवारमध्ये १९ हजार ९ सय ७९ घरपरिवारमा एक न एक बालिका रहेका छन् । बालबालिका नरहेका घर परिवारको संख्या ७ हजार ७ सय ९७ रहेको छ । यस्तै कूल घर परिवारमध्ये ४ हजार ८ सय ४७ घर परिवारका एक न एक सदस्य बिदेशमा रहेका छन् । बिदेशमा गएका परिवार भित्रपनि ३ हजार ५ सय १२ घर परिवारमा बालबालिका रहेका छन् भने १ हजार ३ सय ३५ घर परिवारमा भने बालबालिका छैनन् । स्वदेशमा रहेका २२ हजार ९ सय २ घर परिवारमध्ये १६ हजार ४ सय ४९ घर परिवारमा बालबालिका छन् भने ६ हजार ४ सय ५३ घर परिवार भने बालबालिकाबिहिन छन् ।

उता,  घरको बनोट अनुसार ताप्लेजुङमा ढुङ्गा,माटो जडित घरमा बस्ने घर परिवारको संख्या २३ हजार ३ सय ४४ रहेको छ । २ हजार ६८ घर परिवार भने सिमेन्ट,इटा र ढुङ्गा जडित घरमा बस्ने गरेको राष्ट्रिय जनगणना २०७८ को तथ्याङ्कमा उल्लेख गरिएको छ । १ हजार ५२ घर परिवार काठ र फल्याक प्रयोग गरेर बनाइएको घरमा बस्छन् । ८ सय ३१ घर परिवार बाँसजन्य सामग्रीबाटठ बनाइएको घरमा बस्ने गरेको पाइएको छ । १२ घर परिवार काँचो इटा प्रयोग गरी बनाइएको घरमा बस्छन् भने ४ सय ४३ परिवार जस्तापाता वा टिनको पूरै प्रयोगबाट बनाइको घरमा बस्ने गरेको जनगणनाको तथ्याङ्कमा उल्लेख छ । तीन घर परिवार प्रिफ्यावको प्रयोगबाट बनेको घरमा बस्ने गरेका छन् भने २३ परिवार उल्लेखित बाहेक अन्य सामग्रीको प्रयोगबाट बनेका घरमा बस्ने गरेका छन् ।