एसईईको ग्रेडबृद्धि परीक्षाका लागि ताप्लेजुङमा तोकिए ६ वटा केन्द्र,केन्द्र तोकिएका बिद्यालयका प्रधानाध्यापक नै केन्द्राध्यक्ष

खगेन्द्र अधिकारी
ताप्लेजुङ,साउन ९ । माध्यमिक शिक्षा परीक्षा(एसईई) २०८० को पूरक ग्रेडवृद्धि परीक्षाका लागि ताप्लेजुङमा ६ वटा केन्द्र निर्धारण भएका छन् ।

शिक्षा विकास तथा समन्वय इकाई ताप्लेजुङका प्रमुख योगेश्वर भट्टराईका अनुसार ग्रेडवृद्धि परीक्षा लेख्ने कूल १ हजार ५ सय १८ परीक्षार्थीका लागि केन्द्र निर्धारण भएको हो । भट्टराईका अनुसार साधारणतर्फका १ हजार ४ सय ५९ र प्राविधिकधारतर्फका ५९ गरी कूल १ हजार ५ सय १८ परीक्षार्थीले ग्रेडवृद्धि परीक्षा लेख्दै छन् । फुङलिङ नगरपालिका वडा नं ४ स्थित भानुजन माध्यमिक बिद्यालयमा १५ वटा बिद्यालयका साधारणतर्फका ३ सय १७ जना परीक्षार्थीले परीक्षा लेख्ने प्रवन्ध गरिएको छ ।

फक्ताङलुङ गाउँपालिका वडा नं ३ लिङखिमस्थित सिँवा माध्यमिक बिद्यालयमा ९ वटा बिद्यालयका १ सय ३५ जना परीक्षार्थीले परीक्षा लेख्नेछन् । यि सबै साधारणतर्फका हुन् । फुङलिङ नगरपालिका वडा नं ३ मेदिवुङस्थित बालसुवोधिनी संस्कृत माध्यमिक बिद्यालयमा १३ वटा बिद्यालयका २ सय ९१ जना परीक्षार्थीले परीक्षा लेख्ने भएका छन् । उक्त परीक्षा केन्द्रका कूल परीक्षार्थीमध्ये २ सय ३२ जना साधारणतर्फका र ५९ जना प्राविधिकधारतर्फका रहने छन् ।

मेरिङदेन गाउँपालिका वडा नं ५ थुकिमास्थित त्रिभुवन माध्यमिक बिद्यालय परीक्षा केन्द्रमा १० वटा बिद्यालयका २ सय ४६ जना परीक्षार्थीले परीक्षा लेख्ने भएका छन् । यो परीक्षा केन्द्रमा पनि साधारणतर्फका मात्र परीक्षार्थी हुने छन् । सिरिजङ्गा गाउँपालिका वडा नं १ सिनामस्थित सिनाम माध्यमिक बिद्यालयमा १४ वटा बिद्यालयका ३ सय ६ जना परीक्षार्थीले परीक्षा लेख्न पाउने गरी केन्द्र निर्धारण भएको छ । यि सबै साधारणतर्फका परीक्षार्थी रहेका छन् । आठराई त्रिबेणी गाउँपालिका वडा नं ३ स्थित सरस्वती माध्यमिक बिद्यालय परीक्षा केन्द्रमा ११ वटा बिद्यालयका २ सय २३ परीक्षार्थीले परीक्षा लेख्न पाउने प्रवन्ध गरिएको छ । यि सबै साधारणतर्फका परीक्षार्थी हुन् ।

शिक्षा विकास तथा समन्वय इकाइ प्रमुख भट्टराईका अनुसार परीक्षा केन्द्र तोकिएका बिद्यालयका प्रधानाध्यापकलाई नै ग्रेडबृद्धि परीक्षाको केन्द्राध्यक्ष तोक्ने गरी निर्णय भएको छ । साधारणतर्फका १ हजार ६ सय ९६ र प्राविधिकधारतर्फका १ सय २६ गरी कूल १ हजार ८ सय २२ जनाले ताप्लेजुङबाट एसईई परीक्षा लेखेकोमा ३ सय ४ जनाले बिभिन्न ग्रेड प्राप्त गरेका थिए भने १ हजार ५ सय १८ जना नन्ग्रेडमा परेका थिए ।